Николай Карачарсков пирӗсем ҫинче - чуна витерекен пурнӑҫ чӑнлӑхӗ: вӑл яланах хӑй куҫӗпе курнине, аван пӗлнине сӑнарланӑ. Ҫынсемпе пулӑмсене пысӑк маҫтӑр философиллӗ шухӑш хывса ҫырнӑ. Картинӑсенче - вӑрҫӑ ачи хӑй ҫичӗ ҫулта чухне суха пуҫ тытни те, тылри хӗрсемпе хӑрарӑмсен тертлӗ шӑпи те. Кайран вӗсем, тӑван Шадриха ялӗнчи салтак арӑмӗсем, ватӑлла унӑн портречӗсен ярӑмне кӗрсе юлнӑ. Тем те тӳснӗ кинемисем пирӗн ҫине витӗрлесе пӑхаҫҫӗ... "Манӑн Раҫҫейӗн куҫӗсем" - ҫапла ят панӑ 2000-мӗш ҫулта ҫырнӑ хайлавне Чӑваш халӑх художникӗ, Пӑрачкав тӑрӑхӗн Хисеплӗ ҫынни. "20-мӗш ӗмӗрти Чӑваш Ен портречӗ" хайлавра - 60 Совет Союзӗн тата Социализмла Ӗҫ Геройӗ. Ҫӗр ӗҫченӗсем те уншӑн - чи пысӑк сумра. 1971-76-мӗш ҫулсенче вӑл ӗҫтешӗсемпе Патӑрьел районӗнчи ҫӗршывӗпе чапа тухнӑ хуҫалӑхра "Эпир "Гвардеецран" ярӑм ҫырнӑ.
Ҫавӑн пекех Николай Прокофьевич ӗмӗр тӑршшӗпех ветерансене ӳкернӗ. Пӗр тапхӑр ӗҫтешӗсен ушкӑнӗпе Вӑрнар тӑрӑхӗнчи Ҫӗрпелте пурӑнса "Янгорчино" колхоз ҫыннисем" ярӑмпа ӗҫленӗ вӑл. 92 фронтовика килтен киле ҫӳресе ҫырнӑ портретсен пуххи - чӑн-чӑн мул: ун пекки ҫӗршывра кӑна мар, тен, тӗнчипе те ҫук-тӑр. Карачарсковӑн тепӗр пысӑк ӗҫӗ, "Ҫӗнтерӳҫӗсем. Ҫӗрпелти майӑн 9-мӗшӗ", чун-чӗрене ҫӳҫентерет. Кашни ҫыннӑн шӑпи - хӑй уйрӑм кӗнеке, ҫак паттӑрсене пӗрлештерекенни - ҫӗршыв инкекӗ. 2015-мӗш ҫулта ӳкернӗ ярӑмра та - художникӑн пысӑк ыратӑвӗ: вӑрҫӑ тата ҫамрӑксен вилӗмӗ. Портрет ӑсти пуласлӑха ҫутӑ шанӑҫпа пӑхса ӳкернӗ хайлавсем те пур, паллах. Чӑваш ӳнерҫисемпе пӗр ҫемьере ӗҫлесе пурӑнакан вырӑс ывӑлӗ ҫак картинине Петӗр Хусанкайла "Эпир пулнӑ, пур, пулатпӑр" тесе ят панӑ.
Николай Карачарсковӑн хайлавӗсем республикӑри, Пӗтӗм Раҫҫейри тата Германири, Норвегири, Америкӑри, Японири, Монголири, Афганистанри куравсене хутшӑннӑ, Шупашкарпа Мускавра уйрӑм выставкӑсем те йӗркеленӗ. Тӑван ялӗнче вара вӑл пуҫарнипе вӑтӑр-вӑтӑр пилӗк ҫул каялла Карачарсковсен картина галерейипе Пултарулӑх ҫуртне уҫнӑччӗ. Сӑрӑ ӑстин ӗҫӗсем - ӗмӗрлӗх, вӗсем тӗрлӗ музейра упранаҫҫӗ.
Марина Карягина, Вадим Владимиров
