Камилла Иванова Герман Лебедев композиторӑн "Шурӑ акӑш" пьесине фортепианопа калама вӗренет. Ҫак хайлавпа вӑл республика шайӗнче иртекен "Жемчужинки Чувашии" фестиваль-конкурса хутшӑнӗ. Хӑйӗн пултарулӑхӗпе ҫавӑн пекех Мария Абдулкина паллаштарӗ. Вӑл та сцена ҫине паллӑ ентешӗн хайлавӗпе тухма хатӗрленет. "Жемчужинки Чувашии" фестивале пӗрремӗш хут Шупашкар районӗнче 2000-мӗш ҫулта Чӑваш Республикин культурӑн тава тивӗҫлӗ ӗҫченӗ Маргарита Павлова тата Сергей Бреус предприниматель тӑрӑшнипе ирттернӗ. Ҫултан ҫул унӑн сумӗ, шайӗ ӳссех пынӑ. Кӑҫал фестиваль 18-мӗш хут пулать, паллӑ ентешсен ҫулталӑкне халалланӑ ӑна. Сцена ҫине тухас кӑмӑллисен йышӗ пӗчӗкех мар - вӗсенчен 60 ытла заявка илнӗ те ӗнтӗ. Ҫакна ака уйӑхӗн 15-мӗшӗччен тума май пур. Ҫурма финал вара ака уйӑхӗн 16-мӗшӗнче пулӗ.
Екатерина Фомина, Святослав Петров
