Пилотсӑр вӗҫев хатӗрӗ е ракета хӑрушлӑхӗпе сирена янӑранӑ чухне кашнин тимлӗхре пулмалла

Тӗп хулари шкулсенче ачасене кӑна мар, учительсене те хӳтӗленме вӗрентеҫҫӗ. Ҫавна май 31-мӗш шкулта черетлӗ тренировка иртрӗ. 

Пилотсӑр хатӗрсем е ракета вӗҫсе килес хӑрушлӑх республикӑра час-часах пулать. Ҫавӑнпа ҫакнашкал самантра кашнин сыхланмалла. Хӑрушлӑх вӑхӑтӗнче мӗн тумаллине учительсем лайӑх пӗлеҫҫӗ. Хальхинче вӗсем пысӑк йышпа тренировка ирттерчӗҫ. Сирена янӑрама пуҫласан лӑпкӑлӑха, тимлӗхе ҫухатма юрамасть. 

Пилотсӑр вӗҫев хатӗрӗсемпе е ракетӑпа тапӑнас хӑрушлӑх пулсан урама тухмалла мар, путвалта, чӳречесӗр пӳлӗмре е ҫуртӑн аялти хутӗнче пытанмалла. Шкулсенче ҫавнашкал вырӑн ӑҫта пулнине пурин те пӗлмелле. 

Хӑрушлӑх вӑхӑтӗнче ачасене хӳтӗлев вырӑнне илсе каясси - учительсен тивӗҫӗ. Унта шыв та, ҫутӑ та пур. 

Ҫакнашкал тӗрӗслевсем ҫурла уйӑхӗнче пӗтӗм Раҫҫейӗпе пулнӑ. Малашне вӗсене кашни виҫӗ уйӑхра ирттерӗҫ. Ҫакӑн евӗр тренировкӑсем пилотсӑр хатӗрсем е ракета вӗҫсе килес хӑрушлӑхра кӑна мар ытти инкек сиксе тухсан та усӑллӑ пулма пултарӗҫ. 

Тренировка ӑнӑҫлӑ иртрӗ. Сирена янӑранӑ чух вӗрентекенсем лӑпкӑ пулсан ачасем те хумханмаҫҫӗ.

Алена Артемкина, Вадим Владимиров