Ҫакӑн евӗр килӗшӗве пӗлтӗр Раҫҫей журналисчӗсен союзӗ Вырӑс географи пӗрлешӗвӗпе организацин Мускаври штаб-хваттерӗнче алӑ пуснӑччӗ. Халӗ ҫак анлӑ пуҫарӑва регионсем те хутшӑнаҫҫӗ. Пӗрле ӗҫлемелли проектсен планне ҫирӗплетсе килӗшӳсем тӑваҫҫӗ.
Чӑваш Енри журналистсен союзӗн ертӳҫи Валерий Комиссаров палӑртнӑ тӑрӑх, республикӑри массӑллӑ информаци хатӗрӗсен географи темине ытларах тимлӗх тума пуҫламалла. Уйрӑмах экологи ыйтӑвӗсене хускатса тӑван тавралӑха тирпейре тытассипе ҫыхӑннӑ ыйтусене ҫутатмалла.
Ҫавӑн пекех журналистсен союзӗ Вырӑс географи пӗрлешӗвӗпе тачӑ ҫыхӑнса тӗрлӗрен конкурссем ирттерме палӑртать. Ҫавна май географсен кулленхи ӗҫӗ-хӗлне, акцисемпе тата экспедицисемпе ҫыхӑннӑ кӑсӑклӑ самантсене ҫутатсах тӑрӗҫ. Ку енпе вырӑс географи обществи ахаль те тухӑҫлӑ ӗҫлет. Иртнӗ ҫулсенче пӗрлешӳ ӗҫӗпе паллаштаракан фильмсем те сахал мар ӳкернӗ, инҫет ҫулҫӳревлӗ экспедицисем ҫинчен видеорепортажсем хатӗрленӗ. Тӗлпулӑва географи пӗрлешӗвӗн пайташӗ, хастар ҫӳлҫӳревҫӗ Никита Гаврилов та хутшӑнчӗ. Нумай пулмасть вӑл велосипедпа Байкал-Монголи-Китай маршрутпа йӗркеленӗ инҫе ҫултан таврӑннӑ. Унта курнӑ-илтнӗ кӑсӑклӑ пулӑмсем пирки вӑл студентсене каласа тӗлӗнтерчӗ.
Алексей Енейкин, Виктор Чугаров
