Пархатарлӑ ӗҫе конгресс шӑпах Денис Щербаковпа Сергей Голицын сӗннипе пуҫӑннӑ. Ҫар операцийӗ мӗнле пынине хӑйсен куҫӗсемпе курнӑскерсем ҫӗршыв умӗнчи йывӑрлӑхран нихӑҫан та пӑрӑнса иртме пултараймаҫҫӗ. Ырӑ шухӑша пӗрлешӳ президенчӗпе вице-президенчӗсем хапӑлласа йышӑннӑ. Май килнӗ таран укҫа уйӑрса хӳтӗлев карри валли кирлӗ хатӗрсем туяннӑ.
Хастарсем конгресс ҫуртӗнчех ятарлӑ пӳлӗм хатӗрленӗ. Тӗрлӗ комитетра тӑрӑшакансенчен ушкӑнсем йӗркелесе черетпе ӗҫе пикеннӗ. Кашниех хӳтлӗх каррине чун ыйтнипе ҫыхать. Ҫак виткӗчсем пӗр-пӗр салтак пурнӑҫне ҫӑлса хӑварма пулӑшсан та тем пек паха пулнӑ пулӗччӗ, теҫҫӗ.
Пуҫаруллӑ та вашават ушкӑнсем, акӑ, 5-мӗш хӳтлӗх каррине ҫыхса пӗтереҫҫӗ. Пӗрисем пусма чӗрсе ҫураҫҫӗ, теприсем ӑна татӑк-кӗсӗке пайласа ҫирӗп кантраран явнӑ сетка ҫумне ҫыхаҫҫӗ. Тӗрлӗ тӗслӗ пулакан хӳтлӗх каррисем кӗҫех салтаксем патне ҫитӗҫ.
Алексей Енейкин
