"МолГород" форум 15 ҫул тултарчӗ

Ку пирӗн архивра упранакан "Ҫамрӑксен хули". 2009-мӗш ҫулта Йӑлӑмра ӳкерсе илнӗ ӑна. Шупашкарти 200-е яхӑн яш-кӗрӗм ун чухне пӗрремӗш хут форума пухӑннӑ. Ӑна пуҫарса яраканӗсем - Алексей Львов, Дмитрий Щепелев тата Алексей Ефимов.  Ҫак ӗҫе тытӑнма вӗсене "Селигер" форум хавхалантарнӑ. "МолГород" проектӑн ӗмӗрӗ вӑрӑм пуласса ӗмӗтленни пурнӑҫланнӑ ҫамрӑксен. 15 ҫулта форума  13 ҫӗршывран, Раҫҫейӗн 23 регионӗнчен 17 пин ҫын хутшӑннӑ, пин те 200 яхӑн эксперт хӑнара пулнӑ. 
Темиҫе кунлӑха йӗркелекен «Ҫамрӑксен хулинчи» пурнӑҫ тулли те савӑнӑҫлӑ иртнӗ. Зарядка, лекцисемпе ӑсталӑх сехечӗсем, спорт ӑмӑртӑвӗсем, ташӑ каҫӗсем - пӗр пушӑ вӑхӑт та пулман. Паллӑ ҫынсемпе тӗл пулни те яланлӑхах асра. Кашни ҫулах форума предпринимательсем, депутатсем, влаҫ органӗсенче ӗҫлекенсем килнӗ. Сӑмахран, 2012-мӗш ҫулта хӗрсемпе каччӑсем Николай Валуевпа курнӑҫма пултарнӑ. Паллӑ спортсменпа тӗл пулас текенсен йышӗ ҫав тери пысӑк пулнӑ. Пӗлӳ пухнипе пӗрлех, ытти ӗҫе те хӑнӑхнӑ ҫамрӑксем. Хӑшӗ-пӗри шӑпах кунта яшка тата пӑтӑ пӗҫерме вӗреннӗ. Теприсем чун савнине тӗл пулнӑ. 2011-мӗш ҫулта форумра Алексеевсен ҫемйи чӑмӑртаннӑ. Туй кӗрлеттернӗ вӗсем. 
Форума хутшӑнакансен чӑтӑмлӑхне ҫанталӑк пӗрре мар тӗрӗсленӗ. 2021-мӗш ҫулта шалкӑм ҫумӑра пула палаткӑсенче пурӑнакансен пӗр кунлӑха  урӑх ҫӗре куҫма тивнӗ. Пӗр-пӗрне пулӑшса, ӑнланса ӗҫлени йывӑрлӑхсене парӑнтарма май панӑ йӗркелӳҫӗсене.
"Ҫамрӑксен хулине" никӗсленӗренпе 15 ҫул ҫитнӗ ятпа вӗсем Чӑваш патшалӑх университечӗн Культура керменӗнче тӗл пулчӗҫ. Проекта тӗрлӗ ҫулта ертсе пынӑскерсен аса илмелли чылай. Вӗренӳ программи те пуян пулчӗ - пухӑннисем экспертсемпе тӗрлӗ ыйту сӳтсе яврӗҫ.   

Екатерина Фомина, Надежда Давыдова, Андрей Шоклев