Ҫӑкӑр-тӑварпа тата юрӑ-ташӑпа кӗтсе илчӗҫ аякри хӑнасене университетра. Вӗренӳпе туризм сменине педагогика университетӗнче 3-мӗш хут йӗркелеҫҫӗ. Хальхинче унта Донбасс тӑрӑхӗнчен 100 яхӑн ача килсе ҫитнӗ. Хӑнасем валли пуян программа хатӗрленӗ. Вӑл шутра вӗсем чӑваш культурипе тата чӗлхипе паллашаҫҫӗ.
Ксения Цеданковапа Светлана Веселина ҫакӑн пек инҫе ҫула пӗрремӗш хут тухнӑ. Вӗсене мӗнле кӗтсе илни те, Шупашкар хули те питӗ килӗшнӗ. Света воспитатель пулма ӗмӗтленет. Ҫавӑнпа Чӑваш патшалах педагогика университетне вӗренме кӗрес тӗллев те пур. Донецкпа Луганскран килнӗ ачасемпе ятарласа вӗреннӗ вожатӑйсем ӗҫлеҫҫӗ.
Пӗрремӗш кунне аякран килнӗ ачасене университетри музейсемпе паллаштарчӗҫ. 14 - 17 ҫулти ҫамрӑксемшӗн ҫак ҫулҫӳрев нумайлӑха асра юласса, вӗсем кунта татах таврӑнма кӑмӑл тӑвасса шанаҫҫӗ йӗркелӳҫӗсем.
Надежда Александрова, Виктор Степанов
