"Лидер" компани пуҫланӑ ӗҫе ҫӗнӗ инвестор вӗҫлет

Сакӑр ҫул ӗнтӗ ипотека тӳлесе пурӑнатпӑр, туяннӑ хваттере халӗ те куҫаймастпӑр, каласа парать Валентина Бабанова. Строительство компанийӗ 20-мӗш ҫултах ҫурта хута яма шантарнӑ. Анчах та сӑмахне тытайман. Темиҫе ҫул кунта шӑплӑх хуҫаланнӑ. 

Кӑҫалхи ҫӗртме уйӑхӗнче Чӑваш Енри строительство министерстви "СМУ-13" пӗрлешӳпе килӗшӳ тунӑ. Инвестор "Кувшинка" микрорайонти икӗ позицие тата "Гагарин" ҫурт-йӗр комплексне хӑпартма шантарнӑ. Шӑпах ҫак объектсене "Лидер" строительство компанийӗ вӗҫлеймен. Ҫуртсене инвестор пӗтӗмпех хӑйӗн укҫи-тенкипе хӑпартать. Республика ҫакӑншӑн ӑна хушма ҫӗр лаптӑкӗсем уйӑрса панӑ. 

Ҫакна палӑртмалла: "СМУ-13" пӗрлешӳ ҫуртсене хута яма ҫеҫ пулӑшать. Малашне вӗсене "Лидер" компаниех пӑхса тӑрӗ. Сӑмах май, унӑн пуҫлӑхӗсен тӗлӗшӗпе уголовлӑ ӗҫ те пуҫарнӑ. Вӗсене пула 1000 ытла ҫын шар курнӑ. "Гагарин" ҫурт-йӗр комплексӗнче икӗ ҫурта пӗтӗмпех туса пӗтернӗ "СМУ-13" пӗрлешӳ. Ҫак кунсенче 2-мӗш позицине ӑшӑ та панӑ. Ҫывӑх вӑхӑтра ҫынсене хваттер уҫҫисене валеҫсе памалла. 2-мӗш позицине вара чӳк уйӑхӗн вӗҫӗнче хута яма палӑртнӑ. Ҫуртсем ҫумӗнчи лаптӑка хӑтлӑх кӗртнӗ те ӗнтӗ. Ача-пӑча тата спорт лапамӗсем йӗркеленӗ. Пушаннӑ бригадӑсене "Кувшинка" микрорайона унти рабочисене пулӑшма куҫарӗҫ. 

Ҫуртсене иккӗшне те хӑпартса лартнӑ. 3-мӗш позицинче ӑшӑ тата шыв пӑрӑхӗсене вырнаҫтарнӑ. Чӳречесене те лартса пӗтернӗпе пӗрех, юлашки хутра ҫеҫ юлнӑ. 19-мӗш позицире вара ку енӗпе ӗҫ вӑраха кайнӑ. Пӗр уйӑхра мӗн палӑртнине пурнӑҫа кӗртме шантарчӗ инвестор. 

Ӗҫ мӗнле пынине ҫынсене пӗлтерсех тӑма шантарчӗҫ. Ҫитес тӗл пулӑва раштав уйӑхӗнче ирттерме палӑртрӗҫ. 

Вероника Павлова, Димитрий Макаров