Иҫӗм ҫырли ҫупкӑмӗсем пиҫсе хӗрелсе ҫитнӗ те ӗтнӗ. Ытти ҫул вӗсене утӑ уйӑхӗнчех пуҫтарнӑ, кӑҫал тӑхтама тивнӗ, - каласа параҫҫӗ Гавриловсем. Ҫуркунне ҫырласене тӑм тивнӗ. Апла пулине те тухӑҫ савӑнтарать.
Ку сорт - чи шултрисенчен пӗри. Пӗр ҫупкӑмӗ икӗ кило таран тайма пултарать. Ӑна теплицӑра ӳстереҫҫӗ. Кунта чи черченнисене куҫарса лартнӑ. Вӗсем валли шӑвармалли хатӗр те ӑсталанӑ Иван Гаврилов. Иҫӗм ҫырлин тымарӗсене ытлашши нӳрӗкрен сыхламалла. Ҫавӑнпа та ҫӗр айне ятарлӑ пӑрӑх вырнаҫтарнӑ, унта вун-вун шӑтӑк.
Шывпа тултарнӑ пластик савӑтсем те теплицӑра ахальтен мар. Вӗсем ӑшӑ хатӗрӗ вырӑнӗнче. Ҫуркуннехи сивӗсене тӳссе ирттерме пулӑшаҫҫӗ. Вунӑ ҫул ытла ӗнтӗ Гавриловсем кӑнтӑр енчи ӳсен-тӑрана тӗпчеҫҫӗ. Тивӗҫлӗ канӑва тухсан ытларах кӑсӑкланма тытӑннӑ. Шупашкартан яла та куҫнӑ. Ватӑ амӑшне те пулӑшмалла пулнӑ. Ҫапла майпа Шупашкар троллейбус управленийӗнче ӗҫленӗскерсем пахчаҫӑ ӗҫне кӳлӗннӗ. Тӗмӗсемпе Муркаш тӑрӑхӗнчи ҫывӑх тӑванӗ тата паллӑ пахчаҫӑ Александр Ванюшкин тивӗҫтернӗ. Кайрӑн сортсемпе ытти селекционерсемпе ылмашӑнма пуҫланӑ. Халӗ Гавриловсен пахчинче 40 ытла сорт. Им-ҫампа усӑ курмаҫҫӗ. Эгологи тӗлӗшӗнчен таса хутӑшсемпе ҫеҫ ӗҫлеҫҫӗ. Тӗслӗхрен, йӑрансене кӗлпе сапаҫҫӗ. Иҫӗм ҫырлине сутма мар, хӑйсем валли ӳстереҫҫӗ. Ҫав вӑхӑтрах ҫырлапа сӑйланма килекенсене хаваспах кӗтсе илеҫҫӗ.
Гавриловсен пахчинче иҫӗм ҫырлисӗр пуҫне абрикос, китай финикӗ, гуми, годжи, инжир тата аҫтӑрхан мӑйӑрӗ ӳсет. Ҫакӑнпа кӑна ҫырлахасшӑн мар вӗсем. Каҫал тӑрӑхӗнче тата мӗн интересли ӳстерме пулать-ши, тесе шутлаҫҫӗ.
Вероника Павлова, Екатерина Янгалакова
