Ирсерен ачасем шкула, ытти вӗренӳ учрежденине, аслисем ӗҫе васкаҫҫӗ. Анчах чарӑнӑва тухни усӑсӑр. Шупашкарта пир-авӑр комбиначӗ тӗлӗнчи тата Олимп микрорайона кӗрекен пӗртен-пӗр 7-мӗш "Э" маршрут юлнӑ. Унта та пулин пӗртен-пӗр автобус. Халӑхӑн вӑл ҫаврӑнса ҫитессе сехет кӗтме тивет. Ҫакӑ кунта пурӑнакансемшӗн чӗр нуша. Ватти-вӗтти Калинин урамне ҫити хӑшӗ таксипе тухать, хӑшӗ ҫуранах утать. Алла Салаева ҫак ыйтӑва татса парассине малтанах микрорайон шайӗнчен пуҫлама сӗнчӗ.
6 ачаллӑ Наталия Шилован хӑйӗн чун ыратӑвӗ. Йышлӑ ҫемье пурӑнмалли кӗтес илме вӑхӑт ҫитессе чӑтӑмсӑррӑн кӗтет. Черетре вӗсем 2014-мӗш ҫултанпа. Халӗ 7-мӗш. Хваттер уҫҫине алла илесси вӑраха кайнӑ. Хула администрацийӗнчен пӗлтернӗ тӑрӑх, ҫӗнӗ те хӑтлӑ хваттере Наталия пысӑк ҫемйипе ҫитес ҫул куҫма пултарӗ. Мухтавлӑ ентешсен ҫулталӑкӗ Чӑваш Республикин аталанӑвне пысӑк тӳпе хывнисене аса илни, вӗсен ятне халӑх асӗнче ӗмӗрлӗх хӑварассипе ӗҫлени тем пек вырӑнлӑ. Ҫак шухӑша тӗлпулура та палӑртрӗҫ. Агропромышленноҫ комплексӗн ветеранӗсен Союзӗн председателӗ Александр Самылкин Семен Ислюкова ҫапла чыс тӑвасси пирки сӑмах пуҫарчӗ.
Алиса Александрова, Сергей Емельянов
