"Кашни ачан ҫемьере пурӑнмалла!"

Ҫемье - кашни ҫын пурнӑҫӗнчи чи пысӑк хаклӑх. Ачасем пурри вара - телей. Ку форума 2013-мӗш ҫултанпа йӗркелеҫҫӗ. Ӑна усрава илнӗ ҫемьесен ырӑ тӗслӗхӗпе паллаштарас, вӗсен сумне ӳстерес тӗллевпе ирттереҫҫӗ. Вӑрмар тӑрӑхӗнчи Шӑплат ялӗнче пурӑнакан Рыжовсен хӑйсен 4 ача. Унсӑр пуҫне 13 ача усрава илнӗ. Вӗсенчен 11-шӗ ҫитӗннӗ ӗнтӗ, хӑйсен ҫемйисем. "Килсех ҫӳреҫҫӗ, мӑнуксем савӑнтараҫҫӗ", тет Лидия Рыжова. 

Оксанӑпа Елена ӳкерме юратаҫҫӗ. "Ҫемье ӑшши" пултарулӑх конкурсӗнче "Килти эрмитаж" номинацире Рыжовсен ҫемйи 2-мӗш вырӑн йышӑнчӗ. Етӗрне тӑрӑхӗнчи Анат Явӑш ялӗнчи Григорьевсем хӑйсен 5 мӑнукне пӑхаҫҫӗ. Чи кӗҫӗнни - 3 ҫулта. Ачасем ырӑ ҫын пулса ҫитӗнччӗр теҫҫӗ Григорьевсем. "Визитная карточка" номинацире вӗсем 3-мӗш вырӑна тивӗҫрӗҫ.

Патӑрьел тӑрӑхӗнчи Гурьяновсем виҫӗ ачана ҫемье ӑшши парнелес тесе тӑрӑшаҫҫӗ. "Мӑшӑр питӗ пулӑшса пырать. Вӑл ывӑл ачашӑн тӗслӗх. Хӗр ачасем вара ытларах хам ҫумра", - тет Татьяна. Пушӑ вӑхӑта та туслӑ йыш пӗрле ирттерет.

Патӑрьел тӑрӑхӗнчи Анат Чакӑ ялӗнчи Клементьевсем 3 ача ҫуратса ӳстернӗ. Вӗсем ҫитӗнсе тухса кайсан питӗ тунсӑхчӗ вара 2 ача усрава илтӗмӗр", - тет Наталья Клементьева.

Вӗренӳ министрӗ Дмитрий Захаров пӗлтернӗ тӑрӑх, республикӑра 2000 пин ытла тӑлӑх тата ашшӗ-амӑш хӳттисӗр юлнӑ ача шутланать. Ку йыш ҫулсерен сахалланса пырать. Ҫакӑнта республика Правительствин тата опека органӗсен тӳпи пысӑк. Ҫав вӑхӑтрах Ача ҫурчӗсенчи тата 100 ача кил ӑшшине туйса курас ӗмӗтпе пурӑнать. 

Диана Иванова, Вадим Владимиров