1939-мӗш ҫулта тӑрӑшса вӗренекен ҫамрӑка Хӗрлӗ Ҫар ретне илнӗ. Унтах вӑл пехота училищинче вӗреннӗ. Вӑрҫӑ пуҫланиччен Михаил Яковлевича Каменец-Подольский хулинче пулемет взвочӗн командирӗ пулма шаннӑ. Хаяр вӑрҫӑра аманса чӗрӗ юлма пултарнӑ салтак академи пӗтерсе Совет союзӗн хӗҫ-пӑшаллӑ ҫар тытӑмӗнче вӑй хунӑ. Туркестанпа Вӑтам Азире, Германире хӗсметре тӑнӑ. Совет ҫарӗ валли тӗрлӗрен стратегиллӗ операцисем хатӗрленӗ. Генерал-лейтенант таран ӳссе 23 орден-медале тивӗҫ пулнӑ. Вӑл шутра 4 Хӗрлӗ Ҫӑлтӑр. Михаил Яковлев 2015-мӗш ҫулта сарӑмсӑр пурнӑҫран уйрӑлнӑ. Урама уҫӑлма тухнӑскер машин айне пулнӑ. Ӑна сума суса Германири Совет ҫарӗн ветеранӗсем Яковлев вӗреннӗ шкул ҫинче асӑну хӑми уҫма шут тытнӑ. Хӑйсемех тӑрӑшса укҫа пухнӑ.
Алексей Енейкин, Михаил Солин
