Пысӑк ӗҫе ватти-вӗттине явӑҫтарас тенӗ. Ҫапла, ҫитӗнекен ӑру та хӑйӗн шухӑшне палӑртма пултарнӑ. Малтанах шкул ертӳҫисем сӗннӗ проектсене пӑхса тухнӑ, унтан - ачасенне. "Суйламалӑх, шута илмелӗх пур", - теҫҫӗ вырӑнти пуҫлӑхсем. Пулас паркӑн сӑн-сӑпатне палӑртас ӗҫе шӑпах Комсомольски шкулӗнче вӗренекен ача хутшӑннӑ. Халӑха канма илӗртекен вырӑна ҫул сарса йӗри-тавра карта тытса ҫаврӑнӗҫ, саксем лартӗҫ, каҫсерен хунарсем ҫутатӗҫ.
Элпуҫ ялӗ те ҫултан-ҫул ҫӗнелсе, хӑтлӑланса, аталанса пырать. Кӑҫалхи пысӑк проектсен йышӗнче - ял варринче вырнаҫнӑ "Туслӑх" культурӑпа кану паркне йӗркене кӗртесси.
"Яла хӑтлӑх кӳрес ыйтӑва пӗр хускатнӑ пулсан, пур енлӗн тӑрӑшмалла", - тесе шутлаҫҫӗ элпуҫсем. Ҫӗнӗ шкул та, фельдшерпа акушер пункчӗ те пур, малашлӑхра - Культура ҫуртне юсасси. "Халӑх кӑмӑлӗ пулсан, патшалӑх пирӗн проектсене тивӗҫлӗ хак парса ырласан, укҫи-тенкине уйӑрсан ӳркенсе тӑмӑпӑр", - палӑртаҫҫӗ вырӑнти ертӳҫӗсем.
Алиса Александрова, Виктор Степанов
