Ку шкул Федор Ашмаров ячӗпе хисепленсе тӑрать. Вӑл Мӑн Явӑшра хресчен ҫемйинче ҫуралса ӳснӗ, пӗчӗклех тӑлӑха юлнӑ. Федор Иванович икӗ вӑрҫӑ ҫулӑмӗ витӗр тухнӑ. Вӑл Граждан вӑрҫине хутшӑннӑ, юланутҫӑсен 1-мӗш ҫарӗнче тӑнӑ. 1944-мӗш ҫулхи ҫу уйӑхӗнче вара тепӗр хут ҫара кайма ят тухнӑ. Тӑшмана хирӗҫ 219-мӗш дивизин 375-мӗш полкӗнче ҫапӑҫнӑ, Балти тӑрӑхне фашистсенчен хӑтарнӑ. Латвири Сунуплява хули ҫывӑхӗнче пынӑ тан мар ҫапӑҫура 11 салтак, вӑл шутра Федор Ашмаров та, паттӑрлӑх кӑтартнӑ. Вӗсем 200 ытла нимӗҫе тӗп тунӑ, пӗлтерӗшлӗ сӑрта тӑшмансен аллине паман, хамӑр ҫарсем киличчен тытса тӑнӑ. Ҫакӑншӑн вӗсем пурте "Совет Союзӗн Геройӗ" ята тивӗҫнӗ. Паттӑрӑн кун-ҫулӗпе шкулти музей туллин паллаштарать.
Асӑну хӑмине Патшалӑх Думин депутачӗ Алла Салаева ыйтнипе Раҫҫейри ҫарпа истори обществи хатӗрлӗнӗ. Ку вӑл республикӑри ҫакнашкал 15 асӑну паллисенчен пӗри. Митинга вӗрентекенсем, шкул ачисем, сумлӑ хӑнасем хутшӑнчӗҫ. Шкулта паттӑр вӗреннишӗн эсир чӑннипех те мӑнаҫланма тивӗҫ, терӗ Алла Салаева. Асӑну хӑмине вӗренӳре лайӑх ӗлкӗрсе пыракан ачасем уҫрӗҫ. Мухтавлӑ ентешӗн ятне манӑҫа кӑларманни ӳсекен ӑрӑва тӑван тӑрӑх тата ҫӗршыв историне тӗпчеме хистет. Ҫакӑн пек асӑну хӑмисем республикӑри ытти шкулта та уҫӑлмалла.
Диана Иванова, Димитрий Макаров
