Ятарлӑ учреждение пӗлтӗр ака уйӑхӗнче "Вӑрӑм та хастар пурнӑҫ" наци проекчӗпе килӗшӳллӗн уҫнӑ. Урӑлтаркӑчӑн тӗллевӗ - йывӑр лару-тӑрӑва лекнӗ ҫынсене пулӑшасси, пурнӑҫне ҫӑласси. Республикӑри наркологи диспансерӗ ҫумӗнчи уйрӑм талӑкӗпех ӗҫлет. Кунта васкавлӑ медицина пулӑшӑвӗпе илсе килнӗ ӳсӗрсене йышӑнаҫҫӗ. Малтанах вӗсен сывлӑхне фельдшерсем тӗрӗслеҫҫӗ: юн пусӑмне, температурине, организмри алкаголь шайне виҫеҫҫӗ. Енчен те медицина пулӑшӑвӗ кирлӗ пулсан ытти больницӑсене ӑсатаҫҫӗ. Кунта вӗсене сиплемеҫҫӗ, шыв кӑна параҫҫӗ. Урӑлсассӑн вара килӗсене яраҫҫӗ. Учреждени 20 вырӑнлӑ. Пӗлтӗр ҫулталӑкне 2 пин те 500 ытла ҫынна йышӑннӑ. Вӑл шутра хӗрарӑмсем те пур. Эрех-сӑрапа айкӑшакансемпе кунта профилактика ӗҫне те ирттереҫҫӗ.
Диана Сафонова, Святослав Петров
