20 ҫулти каччӑ Элӗк тӑрӑхӗнчи Кӗҫӗн Тӑван ялӗнче пуҫарнӑ хуҫалӑхӗнче ӗҫлесе пурӑнать, ҫавӑн пекех пӗлӗвне Аграри университетӗнче вӗренсе тарӑнлатать. Кирилл Степановӑн килкартинче тӗрлӗ ӑратлӑ чӑх-чӗп, хур-кӑвакал хӗвӗшет. Кроликсем, сайра тӗлпулакан чӗрчунсем те пур. Ютубра, социаллӑ ытти тытӑмра пин-пин куракана хӑйӗн хуҫалӑхӗнчи кулленхи пурнӑҫӗпе паллаштарать. Мускавра иртнӗ куравра Кирилл хӑй ҫак ӗҫе мӗнле пуҫарса янине каласа панӑ, чи лайӑх блогер ята тивӗҫессишӗн тупӑшнӑ. Инҫе ҫултан вӑл 2 наградӑпа таврӑннӑ. "100 пин таран ҫырӑнакан пӑхса тӑракан топ блогер" номинацире ҫамрӑк фермер 3-мӗш вырӑна тухнӑ, ҫавӑн пекех ӑна "Восходящая звезда" ятарлӑ призпа чысланӑ.
