Полимертан тунӑ пӑрӑхсене строительствӑра, коммуналлӑ хуҫалӑхра, газпа нефть тытӑмӗсенче кӑна мар, ял хуҫалӑхӗнче те анлӑ усӑ кураҫҫӗ. Ҫак предприятире туса кӑларакан хатӗрсем тыр-пул тухӑҫлӑхне ӳстерме, ял ҫыннисен пурнӑҫне ҫӑмӑллатма пулӑшаҫҫӗ. Тӗслӗхрен, хальхи йышши технологисем мелиораци ӗҫӗнче питӗ вырӑнлӑ. Ку ыйтӑва патшалӑх шайӗнче те тимлӗх уйӑраҫҫӗ. Нӳрӗкпе ҫителӗклӗ тивӗҫтерекен уйсенче тухӑҫ самай ӑнса пулать. Ҫавӑнпа республикӑра мелиораци тытӑмне хута яракан хуҫалӑхсен шучӗ ӳсет. Ҫакӑнпа ҫыхӑннӑ тӑкаксене саплаштармалли йӗрке те пур. Ку пӑрӑхсемпе усӑ курмалли майсем тата анлӑ. Ахальтен мар таварпа тӗрлӗ хуҫалӑх ертӳҫисем кӑна мар, инвесторсем те кӑсӑкланаҫҫӗ.
"ПОЛИПЛАСТИК Приволжье" предприяти республикӑра федераци проекчӗсене пурнӑҫа кӗртме пулӑшать. Хальхи вӑхӑтра Шӑмӑршӑ, Комсомольски, Патӑрьел тӑрӑхӗсене таса шывпа тивӗҫтермелли тытӑма тӑвассипе ӗҫлеҫҫӗ. Ҫӗнӗлӗх хута кайсан Чӑваш Енри 85 яла ырлӑх ҫитмелле. Предприяти производствӑра хальхи йышши технологисемпе тата хамӑр ҫӗршыври ҫут ҫанталӑк пуянлӑхӗпе усӑ курать. Ӗҫри ӑсталӑха та, продукцин пахалӑхне те ӳстерсех пыраҫҫӗ. Сӑмахран, полимер пӑрӑхсем 100 ҫул таран упранаҫҫӗ. Ҫакӑ коммуналлӑ хуҫалӑхри хаклӑ юсав ӗҫӗсенчен хӑтарать, укҫа-тенке перекетлеме пулӑшать.
Леонид Петров, Виктор Степанов
