Василий Раймов Йӗпреҫ тӑрӑхӗнчи Чӑваш Тимеш ялӗнче ҫуралса ӳснӗ. Унӑн пултарулӑх ҫулӗ 1974-мӗш ҫулта Пукане театрӗнчен пуҫланнӑ. Артист каярах Герман Лебедев паллӑ композиторпа паллашать. Вӑл ӑна юрӑҫ пулма сӗнет. Ҫамрӑк вара Шупашкарти музыка училищине вӗренме кӗрет, ӑсталӑхне вӑл Тамара Супонина патӗнче туптать. Пултарулӑхри чи пысӑк тапхӑрӗ Чӑваш патшалӑх юрӑпа ташӑ ансамблӗпе ҫыхӑннӑ. Унта вӑл 30 ҫула яхӑн парӑнса ӗҫленӗ.
Кашни кун репетицисем, концертсем. Ӑҫта та пулин гастроле кайсан ялан кӑмӑлпа кӗтсе илетчӗҫ, аса илет Василий Раймов. Чикӗ леш енче те чӑваш юррисене пӗрре мар шӑрантарнӑ. Хӑй вӑхӑтӗнче вӑл "Хунав" фольклорпа эстрада ушкӑнӗ те йӗркеленӗ. Халӑх пултарулӑхне упраса хӑварас тесе тӑрӑшнӑ. Вӑл шутра ача чух кукамӑшӗ юрланӑ юрра ҫӗнӗ пурнӑҫ парнеленӗ.
Василий Раймов ҫитӗнӳсемпе лӑпланса ларасшӑн мар. Репертуара ҫӗнетсех тӑрать. Ӑста юрӑҫа тӗллевӗсене пурнӑҫлама, куракансене малашне те пултарулӑхӗпе савӑнтарма сунатпӑр.
Диана Иванова, Екатерина Янгалакова
