Анатолий Геннадьевич Чӑваш Енпе Шупашкар аталанӑвӗшӗн 1986-мӗш ҫултанпа тӑрӑшать. Малтанах университетра, банк тытӑмӗнче тӑрӑшнӑ, Патшалӑх Канашӗн депутачӗ, Министрсен Кабинечӗн Председателӗн ҫумӗ пулнӑ. 99-мӗш ҫултанпа - Раҫҫей Патшалӑх Думин депутачӗ. Ҫав вӑхӑтранпа чылай саккун проектне йышӑнса ҫӗршыва тата Чӑваш Ене аталантарас тӗлӗшпе нумай ӗҫ тунӑ. Анатолий Аксакова савӑнӑҫлӑ лару-тӑрура хӑю тата ятарлӑ паллӑ ҫакса ячӗҫ, удостоверени пачӗҫ. Саламлама килнӗ хисеплӗ хӑнасем унӑн ӗҫне пысака хурса хакларӗҫ.
Уява пухӑннисене Раҫҫей Президенчӗн хушӑвӗпе ҫирӗплетнӗ наградӑсемпе те чысларӗҫ. Куҫ микрохирургийӗн больницинчи медицина сестри Валентина Порядкова чирлисене йывӑр лару-тӑрура пулӑшу панӑшӑн Крымри Лука ячӗллӗ медале тивӗҫрӗ. Хулари тӗп пульницӑра ӗҫлекен Галина Александрова "Раҫҫей Федерацийӗн тава тивӗҫлӗ врачӗ" пулса тӑчӗ. "Элара" заводӑн тӗп конструкторӗ Андрей Батуринц ӗҫри ҫитӗнӳсемшӗн Президентӑн Тав ҫырӑвне тивӗҫрӗ. Ҫавӑн пекех Чӑваш Ен Пуҫлӑхӗн хушӑвӗпе Министрсен Кабинечӗн Председателӗн ҫумне, регионӑн Раҫҫей Президенчӗ ҫумӗнчи полномочиллӗ представительне Алексей Ладыкова "Республика умӗнчи тава тивӗҫлӗ ӗҫсемшӗн" орден парса чысларӗҫ. Ҫак орден медальне ҫар комиссариачӗн тӗп эксперчӗ Артемий Репкин тата "Союз добровольцев Донбасса" пӗрлешӳ ертӳҫи Сергей Николаев илчӗҫ. Пирӗн ӗҫтеше, Чӑваш радио пуҫлӑхне Эльвира Тимофеевӑна вара "Чӑваш Республикин культурӑн тава тивӗҫлӗ ӗҫченӗ" хисеплӗ ят парса чысларӗҫ.
Алексей Енейкин, Андрей Шоклев
