Хурлӑхлӑ та, ҫав вӑхӑтрах мӑнаҫлантаракан митинга шкул ачисемпе вӗрентекенсем, салтаксен тӑванӗсемпе юлташӗсем, пӗрле ҫар тивӗҫне пурнӑҫланисем пуҫтарӑнчӗҫ. Аллея лартас сӗнӗве ҫӗршыв хӳтӗлевҫисен амӑшӗсем панӑ. Вӑрмар тӑрӑхӗн пуҫлӑхӗ Василий Шигильдеев ку пуҫарӑва пӗр шутламасӑрах ырланӑ. "Хамӑрӑн чӑн паттӑрсене асра тытасси - пирӗн тивӗҫ", терӗ вӑл митинга пухӑннисене саламланӑ май. Аллейӑна Афганистанра, Ҫурҫӗр Кавказра тата ятарлӑ ҫар операцийӗнче паттӑрла пуҫ хунисен ячӗпе уҫрӗҫ. 11-шӗ те ҫак шкултан вӗренсе тухнӑскерсем. 23 ҫулта пулнӑ Вадим Николаев лейтенант ҫар тивӗҫне Челябинск облаҫӗнчи Чебаркуль хулинче 90-мӗш танк дивизийӗнче пурнӑҫланӑ. Ятарлӑ ҫар операцийӗ пуҫлансанах Луганскпа Донецк халӑх республикисене хӳтӗлеме кайнӑ. Шел пулин те, хирӗҫ-тӑрура салтакӑн пурнӑҫӗ татӑлнӑ. Хӑюлӑхпа палӑрнӑшӑн ӑна Паттӑрлӑх орденӗпе наградӑланӑ. Вадим Николаев ячӗпе йывӑҫ лартма салтакӑн мӑшӑрӗ Татьяна 2 ҫулти хӗрӗпе Омск хулинчен ҫитнӗ. Куҫҫульне пытараймарӗ вӑл. "Пысӑк ҫухату, ӗмӗрлӗх суран. Ку туя вара ырӑ астӑвӑм пулӗ. Эпир унпа мӑнаҫланатпӑр", - терӗ.
Петр Владимирович ҫак йывӑҫа хӑйӗн ывӑлне Владимир Сергеева асӑнса лартрӗ. 24 ҫулти аслӑ лейтенант ятарлӑ ҫар операцийӗ пуҫланиччен Кӑнтӑр Цхинвалта службӑра тӑнӑ, танк взвочӗн командирӗ пулнӑ. Тӑван ҫӗршывшӑн, тӗнчери тӑнӑҫлӑхшӑн кӗрешсе хӑйӗн пурнӑҫне шеллемен паттӑр. Мариупольти нумай ҫын пурнӑҫне ҫӑлса хӑварнӑ. Ҫакӑншӑн Владимир Сергеева Суворов медалӗпе чысланӑ. Шел пулин те, пӗр тан мар ҫапӑҫуран салтак чӗрӗ тухайман. Вилнӗ хыҫҫӑн ӑна "Паттӑрлӑх орденӗпе" наградӑланӑ.
Асӑну хӑмисем ҫинчен пӑхакан кашни салтак хӑйӗн ӗмӗчӗпе, тӗллевӗпе пурӑннӑ. Анчах та вӗсем ытла та ир татӑлнӑ. Хуйхӑ Кӗтеснерти Николаевсен ҫемйине те пырса ҫапнӑ. Пермьри ҫар институтне вӗренсе пӗтернӗ Александр Николаев аслӑ лейтенант ҫар тивӗҫне Ленинград облаҫӗнче пурнӑҫланӑ. Брянск тӑрӑхӗнче националистсене хирӗҫ пынӑ ҫапӑҫура паттӑррӑн пуҫ хунӑ.
Туйӑсем тымар ярса ҫулран ҫул тӗрекленсе, ӳссе пырӗҫ. Аллея вара Вӑрмар тӑрӑхӗнче ҫуралса ӳснӗ тӑван ҫӗршыв хӳтӗлевҫисем пирки аса илтерӗ, вӗсен паттӑрлӑхӗпе мӑнаҫлантарӗ.
Диана Иванова, Екатерина Янгалакова
