Студентсем валли пуян та кӑсӑклӑ программа - ӑсталӑх сехечӗсем, вӗренӳ сессийӗсем, лекцисем хатӗрленӗ. Унсӑр пуҫне академи ушкӑнӗсем хӑйсене тӗрлӗ конкурссенче кӑтартнӑ. Ӑмӑрту пынӑ вӑхӑтра "Вконтакте" социаллӑ тытӑмра сасӑлав йӗркеленӗ. Куракансем кӑмӑлланӑ ушкӑна суйланӑ. Ҫак номинацире Чӑваш патшалӑх университечӗн студенчӗсем ҫӗнтерчӗҫ. Ҫавӑн пекех чи лайӑххисене "Эпир ҫемье - эпир академи ушкӑнӗ", "Старостӑсен ҫӑлтӑр сехечӗ", "Хӑвӑртрах, ҫӳллӗрех, вӑйлӑрах" номинацисенче палӑртнӑ. 3-мӗш степеньлӗ диплом лауреатне Алтайри патшалӑх университечӗн академи ушкӑнӗ, 2-мӗшне Уралти юридици патшалӑх университечӗн студенчӗсем йышӑнчӗҫ. "2024-мӗш ҫулхи чи лайӑх академи ушкӑнӗ" ята вара Чӑваш патшалӑх университечӗ тивӗҫрӗ.
Диана Иванова, Игорь Ульянов
