"Раҫҫей шырав юхӑмӗн" хастарӗсемпе студентсен патриотла клубӗсен пайташӗсем тата ҫамрӑк ӑсчахсем Шупашкарта пӗрремӗш хут истори тӗлӗшӗнчен пӗлтерӗшлӗ форума пухӑнчӗҫ. Пӗр-пӗрин пултарулӑхӗпе паллашнӑ май пархатарлӑ ӗҫри ҫӗнӗ технологисен уссине палӑртрӗҫ. Вӑрҫӑ пулнӑ вырӑнсенче тупнӑ шӑм-шакри ДНК тӑрӑх халӗ салтак камне те ҫӑмӑллӑнах палӑртаяҫҫӗ. Ҫапла майпа тӑванӗсене тупма май пур. Ҫи-пуҫ пайӗсем тӑрӑх та архиври документсене тӗпчесе чылай япала пӗлме пулать. Шырав ӗҫӗнчи чи пысӑк телей вара - салтак ятне упракан медальон. Форума Тюмень тӑрӑхӗнчен килнӗ "Кречет" ушкӑн хастарӗсем, акӑ, Шупашкара ырӑ хыпарпа ҫитнӗ. Нумай пулмасть вӗсем, Тверь тӑрӑхӗнчи шыравра медальон тупса вӑрҫӑра пуҫ хунӑ чӑваш салтакӗн ятне-шывне палӑртнӑ.
Ун ӑшӗнчи хими кӑранташӗпе ҫырнӑ хут тӗрки, телее, ҫӑмӑллӑнах вуланнӑ. Салтак - хальхи Вӑрнар тӑрӑхне кӗрекен Мӑн Явӑшра ҫуралса ӳснӗ Иван Волков пулни палӑрнӑ. Салтак Смоленска ирӗке кӑларассишӗн пынӑ ҫапӑҫура пуҫ хунӑ.
Вӑрҫӑра пуҫ хунӑ салтакӑн 84 ҫулти ывӑлӗ патне шыравҫӑсем хӑйсем ҫитсе килчӗҫ. Емӗрӗпех ашшӗне курма ӗмӗтленнӗ ват ҫынна медальонран тухнӑ хутпа салтак тӑприне парса хӑварчӗҫ. Иван Волковӑн вӑрҫӑри кун-ҫулне тӗпчесе ятарлӑ кӑларӑм та хатӗрленӗ вӗсем. Ҫапла майпа паян шырав юхӑмӗн хастарӗсем умне лартнӑ тӗллевӗсене пурнӑҫлас тесе пур енлӗн ӗҫлеме пултарнине кӑтартаҫҫӗ, ҫӗршыв шайӗнче иртекен калӑпӑшлӑ экспедицисене хутшӑнаҫҫӗ.
Ҫакӑн пек истори чӑнлӑхне упрассипе ҫыхӑннӑ форумсенче ҫамрӑксем чылай кӑсӑклӑ пӗлӳ илеҫҫӗ. Шыравпа тӗпчев ӗҫӗнчи кӑткӑс ыйтусене уҫӑмлатса ҫӗнӗ тӗллевсемпе хавхаланаҫҫӗ.
Шыравҫӑсен кӑҫалхи "Астӑвӑм вахти" вӗҫленмен-ха. Кӗҫех вӗсем Псков ҫывӑхӗнчи ҫапӑҫусенче пуҫ хунӑ салтаксене шырама тухса кайӗҫ.
Алексей Енейкин, Екатерина Янгалакова
