Вырӑнти влаҫсем паянхи куна пурӑнакан тӑватӑ ветерана шыраса тупнӑ. Вӗсенчен пӗри - Тури Кӑмашари Ольга Фомина.
Сӑр хӗррине окоп чавма янӑ чухне Ольга Фомина ҫирӗмри хӗр пулнӑ. Киле каймасӑр темиҫе уйӑх ҫӗр пӳртре пурӑннӑ. Урамра 40 грудус сивӗ шатӑртатнӑ. Тум-тирпех ҫывӑрнӑ. Тимӗр кӑмакапа ӑшӑннӑ. Тул ҫутӑлнӑ-ҫутӑлман ӗҫе пикеннӗ. Малтанах апат хатӗрленӗ. Пушӑ хырӑмпа шӑннӑ ҫӗре хускатма йывӑр-ҫке. Пӗҫерме апат-ҫимӗҫпе колхоз тивӗҫтернӗ, аса илет Ольга Михайловна. Варсене икӗ метр тарӑнӑш чавнӑ. "Тӳп-тӳрӗ тунӑ, хӑть линейкӑпа виҫ", тет кинеми. Ольга Михайловна пӗлтӗр раштав уйӑхӗнче ҫӗр ҫул тултарнӑ. Раиса хӗрӗн сӑмахӗпе, вӑл 92 ҫулчченех выльӑх-чӗрлӗх тытнӑ. Халӗ ӗнтӗ кинемине тӑванӗсем пӑхса пурӑнаҫҫӗ. Вероника Павлова, Вадим Владимиров
