"Сысна ҫурипе лӗпӗш" пьеса авторӗ - Александр Пӑртта. Чӑваш патшалӑх академи драма театрӗ ку ӗҫе ахальтен мар суйласа илнӗ. Культура министерстви ҫыравҫӑсем хушшинче йӗркеленӗ конкурсра ку произведени чи лайӑххисен шутне кӗнӗ. Спекталь вырӑсла. Ҫав вӑхӑтрах тумсене чӑваш эрешӗсемпе илемлетнӗ. Ҫӗнӗ постановка Совет тапхӑрӗнчи мультфильмсемпе юмахсен ӑшӑлӑхне аса илтерӗ.
Юмахра Хрюша сысна ҫурипе Серебринка лӗпӗш хушшинче туслӑх ҫуралать. Нӑрик-нӑрик лӗпӗш пек ҫунат сарса вӗҫме ӗмӗтленет. Анчах та темӗн те пӗлекен автанпа чӑх сысна ҫурине ура хурса пыраҫҫӗ. Лару-тӑрӑва Жу-жу пыл хурчӗ ҫӑлса хӑварать. Ӗҫлев тата социаллӑ хӳтлӗх министерстви тӑрӑшнипе премьерӑна чи малтанах нумай ачаллӑ тата йывӑр лару-тӑрӑва лекнӗ ҫемьесем хакларӗҫ.
Залра юмах пӑхнӑ хыҫҫӑн уяв фойене куҫрӗ. Ачасем Ҫӗнӗ Ҫулӑн тӗп сӑнарӗсемпе вӑйӑ картинче ҫаврӑнчӗҫ, Хӗл Мучипе Юр пикерен пылак кучченеҫсем тивӗҫрӗҫ. Кун пек уявсем театрта кӑрлач уйӑхӗн 8-мӗшченех пырӗҫ.
Леонид Петров, Игорь Зверев
