Кайӑксен сассипе киленме хула паркӗнче халӗ тата та меллӗрех пулӗ. Хӑйне евӗрлӗ саксемех мӗне тӑраҫҫӗ! Сукмаксене те хӑрушсӑрлӑх йӗркине пӑхӑнса тунӑ - ҫемҫе сий сарнӑ. Йӗпе-сапара та атӑ-пушмак шумасть. Сӑмах май, паркра 10 ытла ватӑ юман. Ӗҫ вӑхӑтӗнче вӗсен тымарӗсене амантас мар тесе ҫулсене аяккарах сарнӑ. Ҫӗмӗрлесем улшӑнусене хаклама ӗлкӗрнӗ те ӗнтӗ.
Каҫхине те хӑтлӑх хуҫаланать. Вун-вун ҫутӑ хунарӗ вырнаҫтарнӑ. Саксемпе кӑна ҫырлахман, беседкӑсем те ӑсталанӑ.
Ҫӗмӗрле пӗчӗк хуласен сӑн-сӑпатне улӑштарас тӗлӗшӗпе пуҫарнӑ Раҫҫейри конкурссенче икӗ хут палӑрнӑ. Проектсене пурнӑҫа кӗртме федераци хыснинчен укҫа уйӑрнӑ. Пурӗ хула паркне ҫӗнетме 200 ытла миллион тенкӗ тӑккаланӑ. Подрядчик иккӗмӗш тапхӑра пӗлтӗр пуҫӑннӑ. Ӗҫе кӑҫалхи ҫурла уйӑхӗн 1-мӗшччен вӗҫлемелле пулнӑ, анчах та вӑраха кайнӑ.
Подрядчике мӗн шухӑшланине пурнӑҫа кӗртме чук уйӑхӗн 1-мӗшччен вӑхӑт панӑ. Сӑмах май, Раҫҫей конкурсӗпе килӗшӳллӗн хулан сӑн-сӑпатне историпе ҫыхӑнтарса улӑштармалла. Пионер организацийӗ 50 ҫул тултарнӑ ячӗллӗ парка ҫӗнетнӗ чухне ҫакна шута илнӗ. Ленин палӑкне малтанхи вырӑна куҫарнӑ тата совет тапхӑрӗнче тунӑ скульптурӑсене ҫӗнӗ пурнӑҫ парнеленӗ.
Сергей Обрубов ӳнерҫӗ вӗсене пӗчӗкрен ас тӑвать. Ҫавӑнпа та ӗҫе хаваспах пуҫӑннӑ. - Чылай ҫынран ырӑ сӑмах илтрӗм, - тет вӑл. Тепӗр самант та ҫӗмӗрлесене канӑҫ памасть. Реконструкци вӑхӑтӗнче паркри пӗверен шыв тарнӑ. Вырӑнти влаҫсен сӑмахӗпе, ҫакна шута илнӗ. Ятарлӑ пӑрӑхсем вырнаҫтарнӑ пӗвене шыв тултармалла. Сӑмай май, хула паркӗнче улшӑнусем татах та пулӗҫ. Хушма асфальт ҫулсем, ача-пӑча лаптӑкӗсем тата парковка йӗркелесшӗн. Ҫак тӗллевсене перекетленӗ укҫапа пурнӑҫа кӗртӗҫ.
Вероника Павлова, Святослав Петров
