Ҫулталӑк ҫурӑ ытла тӑсӑлакан ятарлӑ ҫар операцийӗнче патреккелсем 4 салтака юлашки ҫула ӑсатрӗҫ. Паянхи кун тӑшмана хирӗҫ пӑшал тытса ҫапӑҫакансем вара тепӗр вуннӑн. 600 ҫын пурӑнакан ялшӑн ку калама ҫук пысӑк та мухтавлӑ кӑтарту. Ял-йыш паттӑрсемпе чунтан хӗпӗртет. Ҫав вӑхӑтрах халӑх тӑнӑҫлӑхӗшӑн кӗрешсе ӗмӗрлӗх куҫ хупнӑ салтаксемшӗн хурланать.
Ҫӑмӑл мар вӑхӑтра халӑх пӗрле пулни темрен паха. Патреккелсем яш-кӗрӗме ҫара ӑсатнӑ чух та, ҫапӑҫу хирӗнчи салтаксем патне пулӑшу ярса парассинче те кар тӑрса пӗр ҫыхӑри пек туслӑ ӗҫлеҫҫӗ.
Ҫак ырӑ тӗллевпех Патреккел халӑхӗ ятарлӑ концерта пухӑнчӗ. Ӑна ку ялтах ҫуралса ӳснӗ Алина Добронравова - халӑхра лайӑх пӗлекен Алина Савельева юрӑҫ йӗркелеме шутланӑ. Тӑван тӑрӑхра ятлӑ-сумлӑ артистсемпе пӗрле патриотла уяв йӗркелессине хӑйӗн сӑваплӑ тивӗҫӗ тесе шутлать вӑл.
Концерт тӳлевсӗр иртрӗ. Ҫав вӑхӑтрах кашни кӑмӑл тӑвакан зала кӗрес умӗн ятарлӑ ещӗке укҫа ярса хӑварчӗ. Халӑха уяв кӑмӑлӗ парнелекен артистсем те пӗр пуссӑр юрларӗҫ.
Концертра ятарлӑ ҫар операцине хутшӑнакан салтаксем те пулчӗҫ. Вӗсене сцене ҫинче парне парса тав турӗҫ. Чун ҫирӗплӗхне сунса часрах килӗсене ҫӗнтерӳпе таврӑнма пил пачӗҫ. Пухӑннисене Патреккел халӑх хорӗ, Алина Савельевапа Вячеслав Христофоров, Юрий Кашкӑрпа Евгений Николаев, Сергей Баранов, Ольгапа Валерий Архиповсем, Светлана Карамаликова ертсе пыракан кадет класӗ тата ытти хастар юрӑҫсем чуна витерекен концерт парнелерӗҫ.
Ыркӑмӑллӑх акцийӗнче 80 пин тенкӗ ытларах укҫа пухӑнчӗ. Ҫак тата ытти пархатарлӑ ӗҫе хастар хутшӑнакансем Елчӗк тӑрӑхӗн администрацийӗпе ентешлӗх пӗрлешӗвӗн хисеп хучӗсене, парнесене тивӗҫрӗҫ. Патреккелти культура ӗҫченӗсемпе ентешлӗх пайташӗсене ҫар ветеранӗсен "Доблесть пӗрлешӗвӗн" ертӳҫи Владимир Яковлев тав турӗ.
Ҫапла ҫӗршыв хӳтӗлевҫисене пулӑшма май тупни халӑхри пӗрлӗх туйӑмне вӑйлатать, салтаксене ентешсен тӗревне туйма май парать. Пулӑшу вара яланах кирлӗ. Сӑмах май, ҫак вӑхӑтра кӑна икӗ Патреккел салтакӗ тӗрлӗ хулари госпитальте сурансенчен сипленет. Вӗсен тата ытти паттӑрсен кун-ҫулне кӑштах та пулин ҫӑмӑллатас ӗҫре халӗ кашниех усӑллӑ пулма пултарать.
Алексей Енейкин, Александр Герасимов
