"Шевле" фестиваль тепӗр шӑматкун - утӑ уйӑхӗн 29-мӗшӗнче "Буревестник" турбазӑра пулать. Халӗ кунта палӑртнине туллин пурнӑҫлама хатӗрленеҫҫӗ - волонтёрсем тӗрлӗ капӑрлӑхсем ӑсталаҫҫӗ. Йӗркелӳҫӗсем уяв пӗр пысӑк ӳнер лапамӗ пуласса шантараҫҫӗ. Курма килекенсем художниксемпе, архитекторсемпе тата дизайнерсемпе тӗрлӗ япала калӑплама пултарӗҫ. Уйрӑмах ача-пӑчана анлӑ программа кӗтет.
Ҫав шутра юмах тӗнчине лекеетӗн, актёр е ӳнерҫӗ пулас текенсем валли ӑсталӑх лаҫҫисем, спорта кӑмӑллакансем валли ӑмӑртусем йӗркелеҫҫӗ, супӑнь хӑмписен вӑййи тата хими-шоу вӑхӑта хаваслӑ ирттерме пулӑшӗҫ. Кӑмӑл тӑвакансем экологи сукмакӗпе ҫаран утса тухма пултараҫҫӗ, унтах ҫемьесене ҫут ҫанталӑка упрама вӗрентеҫҫӗ. Фестивальте ҫавӑн пекех республикӑри чи лайӑх поварсем хатӗрленӗ апат-ҫимӗҫпе сӑйлаҫҫӗ. Ал ӗҫ ӑстисен япалисене те туянма пулать.
Каҫхине концерт кӑтартаҫҫӗ. Унта Раҫҫей сцени ҫинче палӑрнӑ пирӗн ентешсем юрлаҫҫӗ - "Обстоятельства", "НЕБЕСАГОРЯТ" ушкӑнсем тата ыттисем те. Атӑл леш енне Шупашкарти юханшыв портӗнчен пӑрахутпа ҫитме пулать. Фестивале уҫӑ сывлӑшра йӗркелеҫҫӗ, палаткӑсенче ҫӗр каҫма май пур. Канмалли куна хаваслӑ кӑмӑл-туйӑмпа ирттернипе пӗрлех, унта хутшӑнакансем ырӑ ӗҫ те тӑваҫҫӗ - йывӑр чирлӗ ачасен пурнӑҫне кӑшт та пулин ҫӑмӑллатакан паллиативлӑ службӑна пулӑшаҫҫӗ.
Ирина Николаева, Анна Филиппова, Екатерина Янгалакова
![](https://px201.medhills.ru/s.gif?mh_id=777c56a4b49d816169e518f01a42b09d&mh_news=Атӑл леш енче "Шевле" ыркӑмӑллӑх музыка фестивалӗ ирттерме хатӗрленеҫҫӗ&mh_tags=фестиваль,общество,&mh_page=http://chgtrk.ru/novosti/obshchestvo/atal-lesh-enche-shevle-yrkamallah-muzyka-festivale-irtterme-haterlenecce/){kind=small}