Ку ҫамрӑксем пур енчен те маттур. Вӗсем вӗренӳре кӑна мар, спортра, наукӑпа тӗпчев ӗҫӗнче пысӑк ҫитӗнӳсемпе палӑрнӑ, тӗрлӗ олимпиадӑра ҫӗнтернӗ. Савӑнӑҫлӑ пухӑва республикӑри шкулсенчи 850 ҫамрӑк хутшӑнчӗ. Шкула ӑнӑҫлӑ вӗҫленӗ ятпа Республика Пуҫлӑхӗ ӑшшӑн саламларӗ. "Ҫитӗнӳре педагогсемпе ашшӗ-амӑшӗн тӳпи пысӑк. Халӗ сирӗн умӑрта аслӑ ҫул уҫӑлать", - терӗ Олег Николаев. Пӗрлӗхлӗ патшалӑх экзаменӗсенче 200 паллӑ пухнисене, обществӑлла пурнӑҫра хастарлӑх кӑтартнисене Тав ҫырӑвӗсем парса чысларӗ. Юлиана Паймуллина Патӑрьелти 1-мӗш вӑтам шкула пӗтернӗ. Хими тата биологи предмечӗсемпе чи пысӑк паллӑ илнӗ. Хӗр тухтӑр пуласшӑн.
Ачасене тивӗҫлӗ воспитани панӑшӑн Олег Николаев ашшӗ-амӑшне те Тав Ҫырӑвӗсем тата алла ҫыхмалли сехетсем парса чысларӗ. Вӗсемшӗн те ҫак самант хумхануллӑ та савӑнӑҫлӑ. Ашшӗ-амӑшӗ ачисене кунсерен хавхалантарса тӑнӑ. Кӑҫал республикӑра 4 пин те 700 хӗрпе каччӑ 11 класс, 14 пин те 500 ача 9 класс пӗтернӗ. 60 ытла вӗренекен экзаменсенче 100 паллӑ пухнӑ.
Халӗ ҫамрӑксем умӗнче тепӗр пысӑк тӗллев - малалла вӗренме кӗрсе алла диплом илесси. Чӑваш патшалӑх университечӗн культура керменӗнче йӗркеленӗ уяв концертпа вӗҫленчӗ.
Диана Иванова, Вадим Владимиров
