Тӗп хулари шкул ачисем Пӗтӗм Раҫҫейри "Пысӑк тӑхтав" конкурсра ҫӗнтернӗ

"Пысӑк тӑхтав" конкурс Раҫҫейре иккӗмӗш хут иртнӗ. Вӑл тӗрлӗ хулари чи пултаруллӑ ҫамрӑксене пуҫтарнӑ. Тупӑшӑва темиҫе тапхӑрпа йӗркеленӗ. Малтанхине Шупашкартан кӑна 860 ача хутшӑннӑ. 37-шӗ ҫурма финала тухнӑ, 10-шӗ вара финалист пулса тӑнӑ. Ҫӗршыври чи маттур вӗренекенсем иртнӗ уйӑхра "Артек" лагере ятарлӑ сменӑна пухӑннӑ. Ҫӗнтерӳҫӗсене тӗрлӗ тытӑмри ҫивӗч ыйтусене мӗнле татса пама пултарни тӑрӑх палӑртнӑ е вӗсене кейс-хӑнӑхтарусем теҫҫӗ. Ҫавӑн пекех ҫамрӑксем проектсем хӳтӗленӗ. "Чи пултарулли" ята Шупашкарти 56-мӗш шкулта 11-мӗш класра вӗренекен Игорь Александров тивӗҫнӗ. Ҫӗнтерӳшӗн ӑна пӗр миллион тенкӗ параҫҫӗ. Малтисен йышне ҫавӑн пекех 44-мӗш лицейра вӗренекен Майя Дмитриева тата 2-мӗш гимназири Яна Семёнова кӗнӗ. Вӗсем 200-шер пин тенкӗ выляса илнӗ. Унсӑр пуҫне 44-мӗш лицейри Кристина Леонтьевапа Михаил Кириллов палӑрнӑ. 

 Диана Иванова, Димитрий Макаров