Добрыня - халӑх эпосӗнчи пӑхаттир ятне панӑ ҫак арҫын ачана ашшӗ-амӑшӗ. "Николай Гаврилов Раҫҫей Геройӗ пек ҫар лётчикӗ пулма тӗллев тытрӑм", - тет вӑл. Янкӑлчри кадет шкулне ятарласа суйласа илнӗ кашни яш чӗринче ҫак ӗмӗт пур пек туйӑнать. Вӗсем пурте Ҫӗршыв умӗнчи тивӗҫсене пурнӑҫлама тупа тунӑ.
Ҫӗнӗ шкул Раҫҫей Федерацийӗн "Ялсене пур енлӗн аталантарасси" патшалӑх программипе килӗшӳллӗн ҫӗкленнӗ. Вӑл кунта ҫуралса ӳснӗ Николай Гаврилов Раҫҫей Геройӗн ячӗпе хисепленни ентешсене уйрӑмах мӑнаҫлантарать. Патриотла воспитание тӗпе хурса ӗҫлекен центр пулса тӑнӑ пӗлӳ ҫурчӗн ӳсӗмӗсем республикӑра та, ҫӗршывра та ҫавна курах пысӑк-тӑр. Сумлӑ хӑнасемпе юнашар хӗрлӗ хӑйӑва касса ҫӗнӗ ҫурта кӗресси - ачасемшӗн ӗмӗр манӑҫми самант. 1975-мӗш ҫулта кунтан вӗренсе тухнӑ Николай Фёдорович хӑй ун чухне ҫапла юмахри кермен пек шкул ҫинчен ӗмӗтленме те пултарайман, анчах Андриян Николаев пек паттӑр лётчик пулас килни тӗллев ҫулӗпе тӳсӗмлӗн утма вӑй панӑ.
165 вырӑнлӑ ҫӗнӗ шкул ҫуртӗнче савӑнса вӗренме, тарӑн та ҫирӗп пӗлӳ илме пӗтӗм май пур. Шкул ҫулне ҫитменнисем валли юнашарах 40 ача вырнаҫмалӑх пӳлӗмсем. Ҫутӑ, ӑшӑ, хӑтлӑ классенче вӗренекен ачасен пит-куҫӗ телейпе ҫиҫет.
Ку вӗренӳ ҫулӗнче шкула 184 ача ҫӳрет, пӗрремӗш класра - вун ҫиччӗн. Физика, хими, биологи класӗсем валли цифра лабораторийӗсем туяннӑ. Нумай компонентлӑ робототехника системисемпе роботсене алла илме вӗренӳ пуххисем, конструкторсемпе ноутбуксем пур. Педагогсем вӗсемпе тухӑҫлӑ усӑ курма хушма программӑсем хатӗрлесе хунӑ та ӗнтӗ.
Калиса Михайловна шкулти Ҫарпа Ӗҫ мухтавӗн музейӗшӗн яваплӑ. 18 ҫул каялла уҫӑлнӑ музейӑн пӗрремӗш экспоначӗ - Николай Гаврилова Раҫҫей Президенчӗ Владимир Путин хисеплесе, ӗҫшӗн тав туса парнеленӗ вымпел. Кунсӑр пуҫне 2006-мӗш ҫултах, шкул уҫӑлнӑранпа 125 ҫул ҫитнӗ ятпа, Раҫҫей Геройӗ хӑй вӗҫнӗ МИ-8Т вертолёта тӑван шкулӗ умне килсе лартнӑ. Кунта таврари шкул ачисем те килсе кураҫҫӗ.
Николай Фёдорович хӑйне физкультурӑпа вӗрентнӗ фронтовика, Михаил Иванова, тав тӑвать: вӑл пӗрмай ачасене спортпа пиҫӗхсе ӳсни пурнӑҫра мӗн таран кирлӗ пуласси ҫинчен хытарса каланӑ. Ҫӗнӗ шкулта спорт залӗ те куҫа савӑнтарать. 68 вырӑнлӑ хӑтлӑ столовӑй, медицина пӳлӗмӗ, логопед кабинечӗ - йӑлтах чи ҫӳллӗ шайра.
Марина Карягина, Павел Иритков
