Чӑваш патшалӑх педагогика университечӗшӗн кӑҫалхи ҫул тепӗр сумлӑ юбилейпе палӑрса тӑрать. 1958-мӗш ҫулхи ака уйӑхӗн 30-мӗшӗнче аслӑ шкула чӑваш патриархӗн Иван Яковлевич Яковлевӑн ятне панӑ. 65 ҫул ӗнтӗ вӗрентекенсене хатӗрлекен университет ҫак чыса сумлӑн та пархатарлӑн тытса пырать. Кунта просветитель ҫуралнӑранпа 175 ҫул ҫитнине халалласа ҫулталӑк тӑршшӗпе тӗрлӗ ӗҫ-пуҫ ирттереҫҫӗ. Вӑл шутра ӑслӑлӑхпа практика конференцийӗсем, куравсемпе семинарсем.
Экспозицире университетри Иван Яковлев музейӗнче упранакан патриархӑн тата унӑн ҫемйин япалисене, сӑн ӳкерчӗкӗсемпе кӗнекисене, ал ҫырӑвӗсемпе докуменчӗсене курма пулчӗ. Кунта ҫавӑн пекех 1913-мӗш ҫулта тухнӑ, ӳкерчӗксемпе илемлетнӗ пӗрремӗш чӑваш букварьне те вырнаҫтарнӑ. Ӑна Чӗмпӗр чӑваш шкулӗнче вӗреннӗ Константин Иванов илемлетнӗ пулнӑ.
Чӑваш патшалӑх педагогика университечӗ йӗркеленӗ экспозиципе Республика Пуҫлӑхӗ Олег Николаев кӑсӑкланса паллашрӗ.
Оксана Верликова, Екатерина Янгалакова
