Кадетсен кӑмӑлпа та, сывлӑх тӗлӗшӗнчен те ҫирӗп пулмалла, вӗренӳре тӗслӗх кӑтартмалла, спортра малтисенчен юлмалла мар. Хӑйсене тӗрлӗ енлӗн хакласа палӑртаҫҫӗ яшсемпе хӗрсем. Юлашки шӑнкӑрав сассипе вӗрентекенсене тав туса, йӑла тӑрӑх ялавпа сывпуллашса пурнӑҫӑн ҫӗнӗ тапхӑрне куҫакан ачасем ҫак кун халичченхи ҫитӗнӗвӗсене пӗтӗмлетсе малашлӑха палӑртрӗҫ. Шупашкарти кадет корпусне Шӑмӑршӑ тӑрӑхӗнчен вӗренме килнӗ Глеб Розов 9-мӗш класс хыҫҫӑн кунтах вӗренесшӗн.
Плац ҫине уяв кунӗ Шупашкар, Ҫӗнӗ Шупашкар, Вӑрмар, Йӗпреҫ, Комсомольски кадечӗсем тухрӗҫ. Ҫӗршывӑн чӑн-чӑн патриочӗсен кирек хӑҫан та хӑйсен пӗлӗвне, хӑнӑхӑвӗсене, ӑсталӑхне кӑтартма хатӗр пулмалла. Сумлӑ хӑнасем умӗнче ҫамрӑксем стройпа утрӗҫ, тӗрлӗ ташӑ кӑтартса пачӗҫ. Уяв ҫулран-ҫул йӑлара ҫирӗпленсе пыракан самантсемсӗр те иртмест. Раҫҫей ялавне кадетсем ҫийӗн вӗлкӗштерсе утса тухрӗҫ, класс ялавӗпе сывпуллашрӗҫ. Ку корпусрах вӗренекенсем ҫар ӑсталӑхне кӑтартса пачӗҫ. Вӗрентекенӗсем ачасемпе мӑнаҫланма сӑлтав чылай пулнине палӑртрӗҫ.
Республика Пуҫлӑхӗ Олег Николаев та кадетсене мал ӗмӗтлӗ, хастар пулма, йывӑрлӑхсем умӗнче пуҫ усмасӑр тӗллевсем патне талпӑнма сунчӗ.
Алиса Александрова, Виктор Степанов
