Илемлетнӗ фоере пӗлӳ парассинче усӑ куракан хальхи технологисен куравне йӗркеленӗ. Пуҫтарӑннӑ хӑнасем унпа кӑсӑкланса паллашрӗҫ. Педагогсене професси уявӗпе саламланӑ май Республика Пуҫлӑхӗ Олег Николаев, вӗренӳ тытӑмне аталантарма патшалӑх нумай укҫа-тенкӗ уйӑрнине, педагогсем хӑйсен ҫитӗнӗвӗсемпе Чӑваш Ен чысне ҫӳллӗ шая ҫӗкленине палӑртрӗ.
Вӗренӳ тытӑмӗнче нумай ҫул ырми-канми тӑрӑшакансене Патшалӑх наградисем парса хавхалантарчӗҫ. "Чӑваш халӑх учителӗ" ята Шупашкар тӑрӑхӗнчи Тутаркасси шкулӗнче чӑваш чӗлхипе литературине вӗрентекен Альбина Ишова тивӗҫрӗ. Унӑн педагогикӑри стажӗ ҫур ӗмӗре яхӑн. Альбина Валентиновна - Чӑваш Республикин тава тивӗҫлӗ учителӗ. Вӑл пӗрре мар республикӑри тата Раҫҫейри ӑсталӑх конкурсӗсенче палӑрнӑ. Унӑн вӗренекенӗсем те тӑтӑшах олимпиадӑсенче мала тухаҫҫӗ. Ачасенчен чылайӑшӗнпе халӗ те тачӑ ҫыхӑну тытать.
"Чӑваш Республикин вӗренӗвӗн тава тивӗҫлӗ ӗҫченӗ" ята 3 педагог тивӗҫрӗ.
Дмитрий Захаров министр республикӑн вӗренӳ тытӑмӗ ҫӗршывра чи лайӑххисен шутне кӗнине, наци проектне пурнӑҫа кӗртессипе вара 5-мӗш вырӑнта тӑнине палӑртрӗ. Ҫакӑнта ачасене чунне парса ӗҫлекен педагогсен тӳпи пысӑк, терӗ.
Ҫулсерен вӗрентекенсен ӑсталӑхне ӳстерес тӗллевпе професси конкурсӗсем йӗркелеҫҫӗ. Мала тухакансене, ҫавӑн пекех олимпиадӑсемпе конкурссенче пысӑк ҫитӗнӳ тӑвакан ачасен вӗрентекенӗсене патшалӑх грантсем парса хавхалантарать. Малалла тата тӑрӑшса ӗҫлеме хистет.
Оксана Верликова, Виктор Степанов
