Ульянов ячӗллӗ Чӑваш патшалӑх университечӗ регионти предприятисемпе тачӑ ҫыхӑнура. Аслӑ шкулта студентсемпе аспирантсем, наука ӗҫченӗсем предприятири специалистсемпе ку е вӑл ҫӗнӗлӗхе шутласа кӑларассипе ӗҫлеҫҫӗ. Университетра ҫакна валли ятарлӑ лабораторисемпе кирлӗ хатӗрсем пур. Экономика форумӗнчи курава килнӗ хисеплӗ хӑнасене аслӑ шкулта пурнӑҫа кӗртнӗ 3 проектпа Евгений Кадышев проректор паллаштарчӗ. Сӑмахран, химипе фармацевтика факультечӗн лабораторийӗнче студентсем нефть тата газ уҫлакан промышленноҫра усӑ курмалли резин хатӗрсем шутласа кӑларнӑ. Вӗсем пӑрӑхсене пӗр-пӗринпе сыпӑнтарма, ҫӗр айӗнче ҫирӗплетме кирлӗ. Унччен ҫакнашкал япаласене чикӗ леш енчен кӳрсе килнӗ пулсан, халь Чӑваш Енре туса кӑларнисемпе пӗтӗм ҫӗршыва тивӗҫтереҫҫӗ.
Алена Артемкина, Михаил Солин
