Валерий Кочков ячӗпе хисепленекен спорт шкулӗнче ирӗклӗ майпа кӗрешекенсем ӑсталӑхне туптаҫҫӗ. Ку учрежденире 530 ытла ҫамрӑк атлет вӗренет. Вӗсенчен чылайӑшӗ Раҫҫей тата тӗнче шайӗнчи ӑмӑртусенче пӗрре мар палӑрнӑ. Ҫавӑнпа та ку шкулти хӗрсемпе каччӑсем ытти регионти спортсменсемшӗн тивӗҫлӗ конкурентсем шутланаҫҫӗ. Кӗрешӳҫӗсем кашни кун кавир ҫинче. Вӗсем республикӑпа ҫӗршыв чысне ҫитес вӑхӑтра тӗнче шайӗнче пулакан ӑмӑртура хӳтӗлеме хатӗрленеҫҫӗ. Паллах, спортра ҫитӗнӳсем тӑвасси кирлӗ хатӗрсемпе, ятарлӑ тум-тирпе тивӗҫтернинчен нумай килет. Ҫакна тӗпе хурса 5-мӗш спорт шкулӗн вӗренекенӗсем валли кӑҫал ҫӳхе тата хулӑм костюмсем, ура тӑхӑнмаллисем, трикосем, ҫивӗчлӗхе ӳстерме пулӑшакан эспандерсемпе скакалкӑсем туяннӑ.
Леонид Петров, Святослав Петров
