Тутарстанри уява хӑнасем Чӑваш Ен, Пушкӑрт, Самар, Чӗмпӗр, Пенза тата ытти тӑрӑхран пысӑк йышсемпе килсе ҫитрӗҫ. Уйрӑмах Азербайджанри Биля-Сувар районӗнчен килнӗ авалхи тӑвансене палӑртмалла. Уяв лапамӗнче курса савӑнмалли кашни утӑмрах. Тӑван халӑх ҫи-пуҫӗллӗ ушкӑнсен янравлӑ юрри-кӗвви, вӑй-питти кӗрешсен тупӑшӑвӗсемпе урхамахсен ӑмӑртӑвӗсем, ҫамрӑксен лаптӑкӗсем ӗҫлерӗҫ.
Халӑхӑн авалтан килекен пуян йӑлин кӑткӑс саманчӗсемпе аслӑ сценӑпа ун умӗнчи лапамра паллашма май пулчӗ. Артистсен пӗрлештернӗ ушкӑнӗ ҫамрӑксене мӑшӑрлантарнине, аслисем вӗсене пил парса пурнӑҫ ҫулӗ ҫине тӑратнине кӑтартрӗ. Кунтах ял-йыш нимене пухӑнса ҫурт лартнине тата ҫамрӑк мӑшӑра юратупа телейре, ача-пӑчапа йышланса юман пек паттӑр йӑхпа аталанма суннине сӑнарларӗҫ.
Уяв халӑхне Мускавран килнӗ Патшалӑх Думин депутачӗсем, вырӑнти пуҫлӑхсем, йӗркелӳҫӗсем саламларӗҫ. Ҫак савӑнӑҫлӑ ӗҫ-пуҫ Тутарстан республикинчи чи чаплӑ культура бренчӗсенчен пӗри пулнине каларӗҫ.
Уявра тӗрлӗ ӗҫре ҫитӗнӳ тӑвакансене тав хучӗсемпе, парнесемпе чысларӗҫ. Унтан пурте пӗрле тӑнӑҫ пурнӑҫшӑн йӑла йывӑҫҫи лартса пысӑк уяв картине тӑчӗҫ. Алла-аллӑн тытӑнса пирӗн пуласлӑх пӗрлӗхре пулнине ҫирӗплетрӗҫ. Ялта каҫченех савӑнӑҫлӑ концерт кӗрлерӗ
Алексей Енейкин, Артур Галкин, Александр Герасимов
