Кун ячӗсем, эрнепе уйӑх ячӗсем ӗмӗртен чӑвашла пулни пирӗн асаттесем ҫут ҫанталӑкпа тачӑ ҫыхӑнса пурӑннине ҫирӗплетет, ака-суха ӗҫӗ хресчене уҫлӑха сӑнама хистенӗ, ҫавӑнпа вӗсем тӳпери уйӑхпа ҫӑлтӑрсем, хӗвел ҫӗрпе мӗнле ҫыхӑнура пулнине аван чухланӑ. Сантӑр Пикл ӳнерҫӗ ӳкерчӗкӗсене вырӑнлӑ усӑ курса кӑларнӑ "Эткер" календаре Ҫулталӑк кӗнеки тес килет. Пуҫаруҫӑсем малашне календаре тӑтӑшах кӑларса тӑрасшӑн. Чӑвашла тата вырӑсла ҫырнӑ кун, эрне, уйӑх ячӗсем ҫумӗнче тӗрлӗ ӳкерчӗксем, чӑваш сӑмахлӑхӗнче пурӑнакан ҫул ҫаврӑнӑшӗнчи йӑла-йӗркере усӑ курнӑ ӑслӑ шухӑшсем пулӗҫ.
Марина Карягина, Виктор Степанов
