Хӑйӑрпа ӗҫлекенсене хавхалантарма кунта Наци библиотеки ҫумӗнчи "Эткер" студине ҫӳрекен артистсем килсе ҫитрӗҫ. Вӗсем чӑваш юррисене шӑрантарчӗҫ. Илемлӗ хайлавсем маҫтӑрсене те, куракансене те илӗртрӗҫ. Ҫапла вӗсем авалхи чӑваш культурипе паллашма пултарчӗҫ.
Фестивале 8 регионти 12 скульптор хутшӑнать, 3-шӗ хамӑр республикӑран.10 кунра вӗсем пурӗ 15 кӳлепе ӑсталама палӑртаҫҫӗ.
Елена Кармаева Шупашкарти 6-мӗш ӳнер шкулӗнче вӗрентет, ытларах тӑмран кӳлепесем ӑсталать. Хӑйӑрпа вара пуҫласа ӗҫлет. Йывӑр пулсан ҫак фестваль ӑна питӗ килӗшет. Вӑл кунта хӑйӗн вӗренекенӗсене те ертсе килсе пуҫламӑш тапхӑртан вӗҫне ҫити мӗнле пулнине кӑтартасшӑн. Елена хӑй "Маша тата Упа" мультфильмри сӑнарсене калӑплать. Красноярскри Сергей Асеев Шупашкарта пӗрремӗш хут мар. Халӗ вӑл пӗрремӗш Петӗр скульптурине ӑсталать. Куракансем унӑн ӗҫне тивӗҫлипе хакласса шанать. Мария Соловатовапа Лев Брюханов Ижевскран. Вӗсем хайсен кӳлепине Александр Суворов ҫар пуҫлӑхне халалланӑ. Ку сӑнара ахальтен мар суйласа илнӗ. Александр Суворов 60 ытла ҫапӑҫава хутшӑнса пӗрне те выляса яман. Вӑл чӑннипех те мухтава тивӗҫ. Ижевскран килнӗ маҫтӑрсене Шупашкарта питӗ килӗшет: ҫанталӑкӗ те, ҫыннисем те, хӑйӑрӗ те. Хӑйӑр тенӗрен, кунта 440 тонна кӳрсе килнӗ ӑна. Кӑштах тӑмпа хутӑштарнипе ӗҫлеме те меллӗ. Аякранах курӑнакан кӳлепесем нумай ҫынна илӗртеҫҫӗ.
15 кӳлепе ҫу уйӑхӗн 22-мӗшӗччен хатӗр пулмалла. Кунта сӑн ӳкерӗнме кӑмӑл тӑвакансем нумай пуласси халех куҫкӗрет. Хӑйӑр скульпьтурисен куравӗ вара авӑн уйӑхӗчченех ӗҫлӗ.
Надежда Александрова, Виктор Степанов
