Пушкӑрт республикинче 109 пин ытла чӑваш пурӑнать. Тӑван халӑх культурине, чӗлхине упраса хӑварассине тӗпе хурса пурӑнаҫҫӗ вӗсем. Ҫтерлӗ хулинчи Культура ҫуртӗнче иртнӗ чӑваш тӗррин уявне те йышлӑн пуҫтарӑнчӗҫ. Пултарулӑх ушкӑнӗсемпе тӗрӗҫсем республикӑн тӗрлӗ кӗтесӗнчен ҫитнӗ. Фойере маҫтӑрсем хӑйсен пултарулӑхӗпе паллаштарчӗҫ. Унта курав ӗҫлерӗ. Ӑсталӑхне ӳстерес текенсем вара мастер-класа хутшӑнчӗҫ. Ӑна Чӑваш Енри ал ӑстисен гильдийӗн пайташӗ Любовь Вазюкова ирттерчӗ. Сцена ҫинче вара пултарулӑх ушкӑнӗсем хуҫаланчӗҫ. Чӑваш юрри-ташшипе савӑнтарчӗҫ куракансене, улах ларнине, салтака ӑсатнине, туй йӑли-йӗркине кӑтартрӗҫ.
Екатерина Фомина
