Шупашкарта Раҫҫей Президенчӗн гранчӗпе "Йӑх паллисем: управҫӑ-тутӑрсем" проект пурнӑҫланать

Ӳссе ҫитӗннӗ ывӑла хӗсмете ӑсатни - тӑванӗсемшӗн хурлӑхлӑ, ҫав хушӑрах чунра мӑнаҫлӑх туйӑмӗ ҫуратакан пулӑм. Мӗн авалтан салтак ятне илтме тивӗҫнӗ арҫын чыс-хисепре шутланнӑ. "Уяв" халӑх ансамблӗ пухӑннисене ҫак йӑла-йӗркепе паллаштарчӗ. Ӑсталӑх урокӗсем пуҫланиччен специалистсем салтак тутрисен пӗлтерӗшӗ пирки каласа кӑтартрӗҫ. Пусма ҫине куҫарнӑ тӗрӗ-эреш тарӑн шухӑшлӑ. Кашни ҫӗвви салтака ҫар тивӗҫне чыспа пурнӑҫласа тӑван киле тӗрӗс-тӗкел таврӑнма хӑват парать. 

Паян хӑйсен тивӗҫне ятарлӑ ҫар операцийӗнче пурнӑҫлакансем чӑваш хӗрарӑмӗсем тӗрленӗ тутӑрсем фронтра та пулӑшнине калаҫҫӗ. 3 ҫул каялла Светлана Каликова министр Валерий Степанов офицера парне панӑ. Кӑҫал тӑван ҫӗре чӗрӗ-сывӑ таврӑннӑ Валерий ӑна чӗре ҫумӗнче типтерлӗн упранӑ. 

Проекта ытларах 10 ҫулчченхи ачасенчен пуҫласа 25 ҫулчченхи яш-кӗрӗм хутшӑнать. Йӗркелекенсем 100-е яхӑн заявка йышӑннӑ. Ӑсталӑх урокӗсене 4 пая пайласа ирттереҫҫӗ, кашни ушкӑнра 16 ҫын. Пир ҫине тӗрлӗ эреш куҫарма ӑстасем, ӳнер тӗпчевҫисем вӗрентеҫҫӗ. Ҫав хушӑрах салтак тутрин историйӗпе, ӗмӗртен-ӗмӗре ӑна мӗнле улшӑнусем пырса тивнине ӑнлантараҫҫӗ. 

Ӑсталӑх урокӗсенче тӗрленӗ мӗн-пур тутӑра чӳк уйӑхӗнчи курава тӑратӗҫ. Ун чухне салтак ӑсатнӑ йӑла-йӗркене те туллин кӑтартса парӗҫ. 

Алиса Александрова, Александра Борисова, Вадим Владимиров, Николай Семенов