Ермаковсен мастерскойне ура ярса пуссанах темле аваллӑх тӗнчине лекнӗ пек туйӑнать. Йӗри-тавра тӗрлӗ халӑх йӑли-йӗркипе ҫыхӑннӑ хатӗрсем, тӑмран тунӑ чӳлмек-кӑкшӑмпа ытти савӑт-сапа куҫ тӗлне пулать. Шӑмӑран ӑсталанӑ япаласем те пур. Ҫак мастерскойа мӑшӑр икӗ ҫул каялла уҫнӑ. Маларах вара Александр ҫӗршывӑн тӗрлӗ кӗтесӗнче пулса ытти халӑх йӑлин пуянлӑхне ӑша хывнӑ. - Чӑвашсем вӗсенчен мӗнпе кая-ха,- тесе хӑйӗн тымарӗсене тӗпчеме пуҫланӑ. Мӑшӑрӗпе пӗрле Шупашкарта пултарулӑх лаҫҫи йӗркелесе янӑ. Ӑна тӑван халӑхӑн аваллӑхӗпе ҫыхӑнтарса "Киремет" ят панӑ.
Алексей Енейкин, Михаил Солин
