"Ӗҫе уява кайнӑ пек ҫӳретӗп" текен Валентина Иванова чукун ҫул хӗрринче, Канаш районӗнчи Уйкасра 6 ачаллӑ ҫемьере ҫуралса ӳснӗ. Унталла-кунталла вӗлт те вӗлт хутлакан пуйӑссем хӗрачана ӗмӗт тӗнчине илсе кайнӑ: ӑҫта ларса ҫитме пулать-ши вӗсемпе, ҫӗр ҫинче мӗнле пысӑк хуласем пур-ши? Пӗчӗкскере балерина пулас килни канӑҫ паман. Ачаран илӗртнӗ пуйӑс ял хӗрне Мускаври Щепкин ячӗллӗ театр аслӑ шкулне илсе ҫитернӗ. "Рольсенче эпӗ вылямастӑп, сӑнар пурнӑҫӗпе пурӑнатӑп", - тет Валентина Аркадьевна. Ялан шыраври артист ҫитӗнӗвӗсемпе лӑпланса лармасть. Ахальтен мар ӗнтӗ вӑл - чылай конкурс ҫӗнтерӳҫи. Ҫӗршыв тӑрӑх гастрольте ҫӳренӗ чухне те, театр фестивалӗсенче те Чӑваш халӑх артисчӗ хатӗрлекен тӗрлӗ характерлӑ рольсене хапӑлласа йышӑнаҫҫӗ, уйӑрса палӑртаҫҫӗ.
Марина Карягина
