Мӑнаҫлӑ та янравлӑ, чун-чӗрене тыткӑнлама пултаракан пуян ҫемӗллӗ те тарӑн шухӑшлӑ чӑваш юрри-кӗвви никама та туйӑмсӑр хӑвармасть. Ҫак ламран-лама куҫса пынӑ халӑх туприне музыкӑпа илемлетсе тӗнче умне кӑларас ӗҫре композиторсен тӳпи калама ҫук пысӑк. Чӑваш ҫӗрӗ вара хӑйӗн мухтавлӑ юрӑ-кӗвӗ ӑстисемпе чӑнласах хӗпӗртеме тивӗҫ. Фёдор Павлов, Степан Максимов, Григорий Хирпӳ, Филипп Лукин, Аристарх Орлов-Шуҫӑм, Анисим Асламас тата ытти вуншар сумлӑ та паллӑ композитор тӑван халӑх юррин пин-пин тӗрӗллӗ ылтӑн фондне никӗсленӗ. Чӑваш кӗввине купӑсран пуҫласа симфони оркестрӗ таран аталанма пулӑшнӑ.
Чӑваш юрри-кӗввин ылтӑн ҫӳпҫине иртнӗ ӗмӗртен пуҫласа паянхи кунччен тухӑҫлӑ ӗҫлекен пултаруллӑ композиторсем пуянлатса пыраҫҫӗ. Сцена ҫинче Николай Казаков, Юрий Кудаков, Николай Эриванов, Александр Осипов, Авраам Бурундуков тата ытти музыкҫӑсен хайлавӗсем янӑрарӗҫ.
Республика Пуҫлӑхӗн гранчӗ пулӑшнипе кашни произведенине симфони оркестрӗпе каламалла кӗвӗленӗ. Ҫапла майпа академи симфони капелли "Чӑвш Енӗн вокал карттине" хатӗрленӗ.
Пултарулӑх ушкӑнӗ "Вокал карттин" сайтне те хатӗрленӗ. Вӑл тӑван тӑрӑхри юрӑ-кӗвӗ ӑстисен эткерлӗхӗпе туллин паллаштарать. Капеллӑн хорӗпе оркестрӗ Чӑваш Енӗн тӗрлӗ районӗнче ҫуралса ӳснӗ пултаруллӑ композиторсен хайлавӗсене шӑрантарчӗ. Концерт программинче пурӗ 30 произведени.
Чӑваш халӑхӗн пентатоникӑллӑ, урӑхла каласан пилӗк сасӑллӑ юрри халӗ тӗнчипех паллӑ. Ҫак пуянлӑхӑн тӗрлӗ енӗсем вара Китайпа Венгри халӑхӗсен юррисенче те палӑраҫҫӗ. Ҫак мӑнаҫланмалли пуянлӑхпа Чӑваш Енре пурӑнакансене тӗплӗнрех паллаштарас тӗллевпе кӗҫех 25 ҫул тултаракан симфони Капелли кашни муниципалитета ҫитме палӑртнӑ.
Алексей Енейкин, Екатерина Янгалакова
