Автор хӑйӗн ӳкерчӗкӗсем урлӑ салтаксен паттӑрлӑхне, Раҫҫей ҫарӗн хӑватне кӑтартать. Кунта танксемпе ҫар флотне, артиллерипе пехотӑна, авиацине сӑнланӑ, портретсем те пур. Куравра 30 ытла ӗҫ вырнаҫтарнӑ. Автор хӑй ҫапӑҫу хирӗнче пулман пулин те, унӑн ӳкерчӗкӗсем ҫар ҫыннисен патриотла ӗҫне туллин кӑтартса параҫҫӗ. Алексей Павлов пейзаж ӑсти пулнӑ май, кунта хӗвел аннӑ саманта, шуҫӑма, ҫуллахи ҫанталӑка, хӗллехи вӑрмана та курма пулать.
Куравӑн тӗп тӗллевӗ - ятарлӑ ҫар операцинчи салтаксем ҫӗршыв тӑнӑҫлӑхӗшӗн кӗрешнине кӑтартасси, ҫитӗнекен ӑрӑва вӗсен паттӑрлӑхӗпе ҫывӑхрах паллаштарасси. Экспозицие уҫма пухӑннисем те кунти ӗҫсен пӗлтерӗшӗ ҫав тери пысӑк пулнине палӑртрӗҫ.
Ӗҫсемпе ҫурла уйӑхӗн 6-мӗшчен паллашма пулать. Алексей Павлов ҫар темипе ҫыхӑннӑ ӳкерчӗксене малашне те калӑплас тӗллевлӗ.
Оксана Верликова, Екатерина Янгалакова
