Концерта Муркаш тӑрӑхӗнчи Калайкасси шкулӗнче вӗренекен пултаруллӑ ачасем чӑвашсен "Ниме" йӑлипе паллаштаракан кӑтартупа уҫрӗҫ. Сӑваплӑ тӗллевпе ҫын пухас шухӑша пирӗн халӑх яланах ырласа йышӑнать. Ҫӗршыв умӗнче йывӑрлӑх тухса тӑрсан та чӑвашсем Раҫҫейпе яланлӑхах пӗрле пулнине ҫирӗплетрӗҫ.
Ку ӗҫре уйрӑмах хастар тӑрӑшакансене сцена ҫинче чысларӗҫ. Вӑл йышра Елчӗк тӑрӑхӗнчи Лащ Таяпа чиркӗвӗн пачӑшки Силуан атте те пулчӗ.
Чӑваш наци конгресӗн Пенза тӑрӑхӗнчи уйрӑмӗн ертӳҫи Денис Щербаков вара ҫара пулӑшнӑшӑн ятарлӑ медале тивӗҫрӗ. Сумлӑ наградӑпа ӑна вӑрҫӑ ветеранӗсен "Доблесть" пӗрлешӗвӗн ертӳҫи Владимир Яковлев чысларӗ.
Фронтри салтаксене пулӑшас тӗллевпе конгресс пӗлтӗртенпех ыркӑмӑллӑх акцийӗсем йӗркелет. Ҫар операцине ҫи-пуҫ, апат-ҫимӗҫ, ҫапӑҫу хатӗрӗсемпе ытти кирлӗ япаласем ӑсатать. Ку ӗҫе пӗрлешӳри кашни комитет хӑйӗн тӳпине хывать. Ҫак концертра пухӑннӑ укҫа та пӗтӗмпех ҫӗнтерӳшӗн пулӗ.
Патриотла концерта тӗрлӗ тӑрӑхра ӗҫлесе пурӑнакан ентешсем, сумлӑ юрӑҫсем хутшӑнчӗҫ. Халӑха пӗрлештерекен тӑванлӑхпа паттӑрлӑх юррисем шӑрантарчӗҫ. Мирлӗ пурнӑҫри халӑх пӗр ҫыхӑри пек чӑмӑртанса ҫӗршыва пулӑшса пынӑ чух ҫӗнтерӗве пиртен никам та туртса илеймӗ.
Алексей Енейкин, Олег Цыпленков
