Шупашкара Раҫҫейӗн тӗрлӗ кӗтесӗнчен чи пултаруллӑ ал ӗҫ ӑстисем ҫитнӗ. Йӑлана кӗнӗ йӗркепе маҫтӑрсем хӑйсен ӗҫӗсемпе паллаштараҫҫӗ, пӗр-пӗринпе тупӑшаҫҫӗ. Сакӑр сехет хушшинче вӗсен пӗр-пӗр япала ӑсталамалла. Пӗрремӗш хут конкурсра ҫемье командисем тупӑшрӗҫ. Ҫӗнтерӳҫӗсене 12 номинацире палӑртрӗҫ. Валентина Петухова Пермь тӑрӑхӗнчен. Вӑл 30 ҫул ытла хурӑн хуппипе ӗҫлет. Чӑваш Енре иртекен конкурса 4-мӗш хут хутшӑнать. Ытти ҫулсенче пурак йышши япаласем ӑсталанӑ пулсан, кӑҫал ҫакнашкал илем хатӗрленӗ. "Ҫемьене упрасан Раҫҫее те упратпӑр" тесе ят панӑ ӑна. Тӑрӑшни сая кайман-Валентина Петухова гран-при ҫӗнсе илчӗ.
Шупашкар тӑрӑхӗнчи Нина Михеева ҫак конкурсра пӗрремӗш хут. Вӑл мӗн пӗчӗкрен тӗрлет. 3 ҫул каялла Чӑваш тӗррин шкулӗнчен вӗренсе тухнӑ.
Петр Максимов Канаш районӗнчи Вӑрӑмпуҫ ялӗнче пурӑнать. Хӑваран темӗн те пӗр ӑсталать вӑл. Конкурс валли карҫинкка тата савӑтсем лартмалли ывӑс хатӗрленӗ. Ҫак ӗҫе Петр Иванович хӑйӗн ҫемйине те явӑҫтарать.
Светлана Прокопьева Тутарстанри Ҫыр Чаллӑ хулинчен. Вӑл пир таткисенчен, ҫипсенчен пуканесем ӑсталать. Тӗрлӗ конкурспа фестивале хутшӑнни хӑйне аталанма пулӑшнине ҫирӗплетет маҫтӑр.
Кӑҫалхи конкурс ӑнӑҫлӑ иртнине палӑртрӗҫ тӳресем. Республика ҫыннисем, хӑнисем ӑстасен пултарулахӗпе кӑсӑклансах паллашрӗҫ. Конкурса хутшӑнакансене пурне те дипломсем парса хавхалантарчӗҫ.
Надежда Александрова, Игорь Ульянов
