Ирина Садовникова ҫинчен кирек кампа калаҫсан та, вӑл тӑван театр ӳнерӗшӗн, Ҫеҫпӗл Мишши калашле, "Хӗрлӗ хӗрнӗ хурҫӑ, ҫунтаракан ҫиҫӗм, вӗри вутлӑ ҫулӑм" пулнине ӑнланса илетӗн. Тен, ҫавӑнпах, хӑйне пач упрама пӗлменрен, ытла та ир сӳнчӗ яр! ялкӑшса кайнӑ ҫӑлтӑр. Ҫут ҫанталӑк ӑна пултарулӑхӗпе пӗрле ним хӗрхенмесӗр, йӑлт панӑччӗ. 1989-мӗш ҫулта Мускаври Щепкин ячӗллӗ театр училищинче вӗренме чӑваш ҫамрӑкӗсене суйларӗҫ. Хӗрлӗ Чутай салинче юрласа-ташласа ӳснӗ Ирина Никитина тӗп хуларан килнӗ тӗп тӳресен чун-чӗрине те туххӑмрах ҫавӑрса илчӗ. Пӗр ушкӑнра вӗреннӗ артистсем студент чухне Пётр Садовниковпа мӑшӑрланнӑ ӗҫтешне, ун чухне чӑвашла ирӗклӗн калаҫайман маттур хӗре, ытарайми аса илеҫҫӗ.
Марина Карягина, Святослав Петров
