19-мӗш ӗмӗр-и, 20-мӗш е 21-мӗш - самани улшӑнсан та этем чунӗ ылмашӑнмасть-мӗн. Ҫавӑнпа Александр Островскин пурнӑҫран илнӗ сӑнарӗсем паянхи кураканшӑн та питӗ ӑнланмалла тата вырӑнлӑ, вӑхӑтлӑ. Репетици саманчӗсене ӳкернӗ май, ҫакӑ пире кашни сӑмахпа тыткаларӑш урлӑ курӑнчӗ.
Пӗтӗм пурлӑхне картла выляса янӑ Вадим Дульчин намӑса пӗлмесӗр хӑйне пуҫне ҫухатса савакан хӗрарӑма ҫавӑрса илет. Юрату туйӑмӗпе суккӑрланнӑ чун ултавҫӑ серепине кӗрсе ӳкет. Лешӗ унӑн пуянлӑхӗпе усӑ курма тытӑнать, аллине кӗнӗ укҫине каллех выляса ярать.
Хальхи ҫылӑхпа тулнӑ пӑтрашуллӑ пурнӑҫра этем тасалӑх, тӗрӗслӗх, шанчӑклӑх ҫинчен манса пыни хистенӗ те Наталия Сергеева режиссёра Александр Островскин ҫак пьесине паянхи сцена ҫине кӑларма. Республикӑн тава тивӗҫлӗ артисчӗсем Николай Сергеев, Ирина Верьялова, Валерий Карпов, Раҫҫей тава тивӗҫлӗ артисчӗ Валентина Ситова тата ыттисем ролӗсене хавхаланса калӑплаҫҫӗ. Вӗсем, психологсем пек, пӗр-пӗр сӑнар тӗрлӗ лару-тӑрура хӑйне мӗншӗн апла тыткаланине тӗпчесе ӑнланма, куракан патне тӗрӗс ҫитерме тӑрӑшаҫҫӗ.
Тумтир ӗлкисемпе сценографие Светлана Зверева художник хатӗрленӗ. Спектакле музыкӑпа тата ташӑсемпе илемлетекенӗ - Алексей Тимошенко. Пьесӑна чӑвашла пирӗн ӗҫтеш, радиожурналист, Чӑваш Республикин культурӑн тава тивӗҫлӗ ӗҫченӗ Ольга Туркай куҫарнӑ.
"Юлашки парӑм" спектакль паян Константин Иванов ячӗллӗ Чӑваш патшалӑх академи драма театрӗнче 18 сехет ҫурӑра пуҫланать. Лартакансем унӑн шӑпи 105 ҫул каялла чӑваш театрне пуҫарса яма пулӑшнӑ, Островскин "Хӑв пурӑнас тенӗ пек ан пурӑн" пьесипе лартнӑ спектаклӗнни пекех ӑнӑҫлӑ пуласса шанаҫҫӗ.
Марина Карягина, Михаил Солин
