Ку пултарулӑх ушкӑнӗ республикӑра ӑнсӑртран мар йӗркеленнӗ. Щепкин ячӗллӗ театр училищинчен вӗренсе килнӗ Виктор Петров, Чӑваш Енре шӳт-кулӑ жанрӗ ҫителӗксӗр аталаннине асӑрханӑ. Кӗлпук Мучисӗр пуҫне ку енпе тарӑннӑн ӗҫлекен артист пулман та сцена ҫинче, тет вӑл. Ҫавӑнпа пӗр шухӑшлӑ ҫынсене пуҫтарма шутланӑ. Конкурс ирттересе 10 артистран тӑракан труппа йӗркеленӗ. Илья Семенов, Ольга Терентьева, Василиса Петрова, Юлия Егорова, Николай Кляжев, Ольга Ухтерикова - театрти пӗрремӗш артистсем. Ҫӑмӑл мар 90-мӗш ҫулсенче театрсенче лартмалли хайлавсем те ҫителӗксӗр пулнӑ. Ҫакна шута илсе Чӑваш халӑх поэчӗ Валери Туркай Виктор Петрова сценариста вӗренме сӗннӗ. Ку енӗпе Йошкар-Олара пӗлӳ илнӗ хыҫҫӑн репертуара хӑй ҫырнӑ произведенисемпе пуянлатнӑ. "Кин кӗртесси ҫӑмӑл мар", "Арӑмсем тӑн кӗртрӗҫ", "Петровичӑн хваттерӗ кӗр кӗрлет", "Хӗрсен общежитийӗ каччӑсем валли" спектакльсене куракансем Чӑваш Енре кӑна мар, унӑн тулашӗнче те хапӑлласа йышӑннӑ. Уяв каҫне пухӑннӑ куракансем пултаруллӑ режиссер, сценарист тата артист чӑннипех те хисепе тивӗҫлине каларӗҫ.
Леонид Петров, Елена Дмитриева, Михаил Солин
