Шучӗпе илсен, ку - нумай енлӗ ӳнерҫӗн 57-мӗш куравӗ-мӗн. Ҫутӑ тӗссемпе куҫа туртакан ӳкерчӗксенче пурнӑҫ ҫине, ҫын ҫине юратуллӑ куҫпа пӑхни туйӑнать. Малтан тӑван факультетра, Чӑваш патшалӑх педагогика институтӗнчи ӳнерпе графика факультетӗнче, унтан Венгрире, Мускаври аспирантурӑра пӗлӳ илсе ӑсталӑхне туптанӑ художник ӳнерҫӗн кашни кун вӗренмелле тесе шутлать. Пултарулӑх тӗнчинче хӑйӗн вырӑнне тупнӑ сӑрӑ ӑстин ӗҫӗсене кӑна ыттисенчен тӳрех уйӑрса илетӗн, мӗншӗн тесен маҫтӑр пир ҫине эпир асӑрхаман тӗссене хӑйӗн чунӗпе ӑс-тӑнӗнчен илсе куҫарать.
Паллӑ сӑрӑ ӑстин ӳкерчӗкӗсене курса ҫуталма йышлӑн пуҫтарӑннӑ. Республика Пуҫлӑхӗ Олег Николаев ӑна чӑваш ӳнерне аталантарассине пысӑк тӳпе хывнӑшӑн тата патриот туйӑмне палӑртнӑшӑн "Чӑваш Республики умӗнчи тава тивӗҫлӗ ӗҫсемшӗн" Орден медалӗпе чысларӗ. Нумай пулмасть Анатолий Васильевич Луганск Халӑх Республикинчен таврӑннӑ. Унти краеведи музейне вӑл 50 картина парнеленӗ, ачасем валли ӑсталӑх сехечӗ ирттернӗ.
Курава Анатолий Васильевичӑн вӗренекенӗсем те килнӗ. Вӑл 44 ҫул ӳнерпе графика факультетӗнче ӗҫлесе чылай пултаруллӑ ӳнерҫӗ хатӗрленӗ. Вӗсемшӗн аслӑ вӗрентекенӗн, профессорӑн кашни сӗнӗвӗ паха.
Анатолий Данилов пурин те ҫураҫулӑх саккунне пӑхӑнса пурӑнмалла, вара пурнӑҫ самай илемлӗрех пулӗ тесе шутлать. Куравпа чӳк уйӑхӗн 15-мӗшчен паллашма пулать.
Марина Карягина, Лидия Галактионова, Михаил Солин
